Tratadu ba fronteira marítima ne’ebé asina ona ne’e Parlamentu Nasionál rai rua ne’e presiza atu halo retifikasaun, nune’e bele sai lei ida hodi em vigor iha nasaun Timor-Leste no Austrália.

Prezidente Parlamentu Nasionál, Aniceto Guterres hatete, fronteira marítima ne’e interese nasionál. Tanba ne’e, kuandu governu husu atu halo retifikasaun ba Parlamentu Nasionál prontu, tanba ne’e interese nasionál.

Governu sente katak akordu ne’e iha prazu limitasaun ruma atu kumpre hodi halo retifikasaun ho karakter urjente, la presiza hein fali lejizlatura foun mai mak halo retifikasaun. Bele halo kedas iha lejizlatura agora ne’e.

“Ida ne’e mak dehan urjente ruma klaru ne’e ami deputadu hotu-hotu sei halo konsensu hodi loke plenária estraordinária hodi halo retifika tratadu ne’e”, tenik Aniceto, iha Uma Fukun PN, horisehik.

Iha fatin hanesan, deputadu Bankada KHUNTO husi bloku AMP, José Agostinho hatete, presiza halo retifikasaun ba validasaun akordu ne’e fila-fali ba boa vontade Prezidente Parlamentu Nasionál nian hodi bele konvoka plenária estraordináriu ba asuntu ne’e.

“Ami husi AMP ne’e prontu atu halo retifikasaun iha tempu saida de’it”, tenik nia.

Iha fatin hanesan, tuir Presidente Bankada PD, Maria Tereza Gusmão hatete, Partidu Demokrátiku nia totalidade ba defende riku-soin povu nian dezde inísiu. Tanba ne’e, prontu atu halo saida de’it hodi tau soberania povu nian iha nia-fatin.

“Ha'u hanoin kona-ba retifikasaun ne’e lalais liu di'ak liu tan, tanba rikusoin sira ne’e afavór ona mai ita”, dehan nia.

Nia hatutan, negosiasaun fronteira marítima ne’e remata ona. Tanba ne’e, presiza retifika lalais atu bele halo tan negosiasaun ba kadoras Greater Sunrise nian.