Ministru Estadu no Ministru Rekursu Minerais, Mariano ‘Assanami’ Sabino hatete, governu mantein esforsu oinsá kadoras ne’e dada mai, tanba bele eleva setór ekonómiku sira seluk.

“Kadoras nafatin importante ba ita, tanba negosiasaun ne'ebé agora ita halo ne’e mak kadoras dada mai iha ne’e ka ba Austrália”, dehan nia, iha nia knaar fatin, Fomentu-Bebora, horisehik.

Nia esplika, kadoras ne’e sei fó impaktu ba kampu traballu ema barak ne’ebé servisu iha área ne’e. Tanba ne’e, analiza ekonómiku sei la'o nafatin.

Maski nune’e, Assanami dehan, importante tebes mós ba estudu ambientál, kuandu iha impaktu makaas iha tasi laran mundu bele fo sansaun makaas ba Timor-Leste.

Akordu mundiál ba meu ambientál la’ós de’it nasaun ida-idak, maibé nasaun hotu hamutuk haree tanba ambiente tasi ne’e ba bio-diversidade buat barak tebes mak iha laran. Ne’e duni, presiza estudu ba área sira seluk nian.

Kona-ba setór negósiu analiza ekonomia ne’e tenke ko’alia ho kompañia sira mak sei haree nia lukru.

Tuir governante ne’e, projetu boot sira Suia Supply Base (SSB) ne'ebé halo ona, aeroportu prepara ona, ba oin atu halo nusa para hahú mós estrada husi ne'ebá too Beaçu.

Timor-Leste no Austrália ofisialmente asina ona akordu kona-ba fronteira marítima permanente, maibé kona-ba dezenvolvimentu kampu mina Greater Sunrise nian sei husik hela ba diskusaun iha futuru.

Nune’e, husi nasaun rua ne’e ida-idak defende atu bele kanaliza pipeline ba sira nia área. Austrália hakarak ofrese 80% rendimentu prosesamentu mina no gás iha Greater Sunrise ba Timor-Leste bainhira dada kadoras mina ba Darwin-Austrália.

Nune’e, Timor-Leste mós aprezenta ninia opsaun hodi husu 70% rendimentu prosesamentu mina no gás iha Greater Sunrise ba Timor-Leste bainhira dada kadoras dada mai illa lafaek ne’e.

Entidade hotu-hotu iha Timor-Leste lia ida de’it hakarak maka kadoras tenke mai Timor-Leste. Hanesan mós pozisaun Governu nian.