Objetivu prinsipál iha vizita ne’e, Julie Bishop lori karta konvite husi Governu Australia ba Prezidente Repúblika atu iha futuru bele hala’o vizita traballu ba Australia.
Prezidente Repúblika kontente no apresia konvite ne’ebé Governadór Australia Peter Cosgrove hato'o. Peter Cosgrove nuudar belun di’ak Timor-Leste ne’ebé iha tinan-1999 lidera forsa INTERFET atu tulun timoroan sira moris fila fali iha normalidade nia laran hafoin violénsia ne’ebé governu Indonézia husik hela.
Ministra Negósiu Estranjeiru Australia espera katak Prezidente Repúblika sei hala’o vizita traballu iha Australia iha tinan ne’e hodi hametin liután relasaun entre nasaun rua.
Objetivu husi vizita Julie Bishop mai Timor-Leste ne’e, oinsa atu hametin kooperasaun entre nasaun rua ne’e iha área seguransa, dezenvolvimentu no ekonómia nian iha kapítulu foun ba relasaun Austrália no Timor-Leste nian, hafoin asina tratado ne’ebé estabelese ona ba ami-nia fronteira marítima permanente.
