Elisa Soares (40) durante tinan 13 nia laran, hahú husi tinan 2004-2017, hala’o knar nudar ‘dasa-rai’ iha Universidade da Paz (UNPAZ). Serbisu ne’e nia hala’o atu bele sustenta nesesidade familia no fó eskola ba nia oan mane mesak, Elias Sarmento (21).
Eliza nia oan mane daudauk ne’e kontinua nia estudu iha UNPAZ, iha eskola ne’ebé eliza hala’o serbisu ba. Elias foti estudu iha area Relasaun Internasional, Fakuldade Siensia Sosial no Umaniora.
"Ha’u-nia oan ida de’it, nia eskola iha UNPAZ. Ha’u mak selu nia eskola," dehan Elisa hodi kontinua dasa foer iha aula laran.
Husi serbisu ne’ebé nia hala’o ne’e, kada fulan Eliza simu osan $140. Osan ne’e konsidera kiik no nia tenke dezaraska atu bele sustenta nesesidade familia. Satan tenke selu tan oan nia eskola no nesesidade sira seluk.
Kada semester, Eliza tenke hasai osan $120 hodi selu eskola, ida ne’e seidauk aumenta ho osan ba fotokopia materia ne’ebé dosente sira fó no seluk tan.
Eliza nia kaben serbisu mós iha UNPAZ nudar seguransa, maske nune’e osan ne’ebé sira simu seidauk sufisiente atu bele atende tomak sira-nia nesesidade.
"Dalaruma ha’u deve fali ema-nia osan mak ha’u fó ba ha’u-nia oan atu selu eskola no ba atividade eskola nian,” katak nia.
Maske dezaraska, Eliza kontinua hatudu ninia komitementu. Ho Elias ninia vontade atu eskola no estuda, hakbiit Eliza no nia kaben atu kontinua esforsu an.
"Biar ha’u servisu hanesan ne’e, maibé ha’u-nia oan tenke eskola to’o hotu. Aban-bainrua nia hetan servisu ruma karik agradese," dehan Eliza.
Molok hala’o nia serbisu, Eliza tenke hala’o uluk ninia knar nudar inan. Dadeer nia tenke hadeer sedu hodi halo serbisu uma nian.
Biar kesi-kabun hodi ka’er serbisu, maske sente todan tebes, maibé inan-aman sei la rende. Sira sei esforsu nafatin, luta nafatin no sakrifika sira-nia an hodi bele oferese buat ne’ebé di’ak ba nia oan sira.
Dala-barak sira sente kolen, maibé sira nega sira-nia kolen ne’e ba oan sira no kontinua hatudu nafatin nia oin midar.
"Kolen, ne’e ita kole maibé se ita la halo (serbisu), ita foti osan husi ne’ebé,” katak Eliza.
