Moises Barreto, Xefe Familia husi uma-kain kiik ne’ebé nia harii iha tinan hirak kotuk ba ne’e la’o iha dalan kiik no ai-talek sira leet hodi hakat liu bareira luron naruk laletek foho Dare atu tuun ba nia ‘serbisu-fatin’ iha sidade Dili.

Loro-matan hatudu nia roman husi Foho Kamea tutun, Moises habesik ona iha Marabia tutun. Nia hakat nafatin tuir luron ninin husi aimahon sira okos. La sente, Moises to’o ona iha nia knar fatin.

Iha Hali okos ida iha area merkadu Taibessi, Moises hahú tau nia kadeira kiik, meza no sapatu hirak ne’ebé nia suku ona. Loos, Moises lorloron hala’o serbisu iha Hali okos ne’e hodi suku ema nia sapatu.

Durante tinan tolu (3) nia laran, Moises hala’o ona serbisu nudar suku sapatu. Ho serbisu ne’e, nia konsege hatan netik nesesidade uma-laran nian.

“Ha’u hala’o serbisu ne’e la’os ba ha’u-nia an, ha’u halo ida ne’e tanba (familia) sira,” dehan Moises iha dadalia ho jornalista INDEPENDENTE iha ninia knar-fatin, Taibessi, foin lalais ne’e.

Loron hahú manas, oras muda ona, Serbisu lubun konsege halo ona. La sente, kabun komesa husu ninia direitu. Moises hases an uitoan husi movimentu lubun nia le’et hodi hakat ba lidun sorin. Nia uza osan uitoan ne’ebé nia hetan hodi ense kabun.

Hafoin sente kabun bosu, Moises hakat fila ba nia serbisu-fatin hodi kontinua hala’o serbisu balun ne’ebé seidauk konsege halo. Maske anin fresku ne’ebé huu hahú habosok matan, maibé Dare-oan ne’e la deskansa. Sapatu lubuk ida hein hela nia. Ho pasensia, nia kontinua suku.

Rezultadu suku sapatu ne’ebé Moises halo fó satisfas ba ninia kliente sira, tan ne’e la’os surpreza bainhira Moises nia fatin ne’e sempre nakonu ho sapatu.

Kliente ida, Pricilia Marta dehan, bainhira nia sapatu ruma aat, nia sempre mai suku iha tiu Moises nia fatin, tanba rezultadu di’ak.

“Ha’u suku bebeik sapatu iha nia (Moises), (tanba) kapas no metin. Nia pasensia, ema barak gosta mai suku sapatu iha nia,” dehan Pricilia.

Tempu la’o daudauk ona, la sente tempu mós muda an. Loro-matan ne’ebé hahú subar an iha loromonu obriga Moises atu tenke haloot ona sasan maske serbisu balun seidauk konsege halo.

Nia deside atu haloot sasan. Serbisu ne’ebé seidauk halo nia bele kontinua balun iha uma, tanba nia promete ba nia kliente katak iha loron tuir mai sapatu ne’e prontu ona.

Moises aruma sasan hotu ne’ebé ohin dader nia lori hodi kontinua hakat neneik tuir dalan fila ba uma. Tan nakukun hahú dolar mai, Moises deside hodi sa’e mikrolete 04 ne’ebé sei hatun nia iha Hali-laran hafoin nia kontinua la’o ba ninia hela fatin.