Antes ne’e, Prezidente Repúblika Lú-Olo inisiativa konvida Prezidente AMP Xanana Gusmão hodi diskute impase polítika iha rai-laran.

Xanana dehan, bainhira hasoru malu ho Prezidente Repúblika altura ne’ebá partidu CNRT hala’o konferénsia iha nasionál atu husu rezigna aan, maibé Xefe Estadu rasik la aseita Xanana Gusmão demite aan husi Prezidente CNRT.

“Agora atu hasoru malu nia Prezidente Repúblika (Lú-Olo) atu dehan sá?,” deklara Xanana, iha Sede CNRT, Bairru Grilos-Dili, Domingu (8/4).

Nia dehan, Prezidente Repúblika hein iha Palásiu Bairru-Pité atu ko'alia saida, tanba to’o oras ne’e seidauk simu karta ofisial husi Xefe Estadu atu diskute saida, tanba oras ne’e la’ós ona tempu atu hasoru Prezidente Repúblika.

Nia dehan, tanba oras ne’e lider AMP na’in tolu prepara-aan halo kampaña ba eleisaun antesipada, ne’ebé laiha tempu atu hasoru Prezidente Repúblika hodi diskute impase polítika ne’ebé liu ona.

Tuir Xanana, antes ne’e Prezidente Repúblika rasik mak foti ona desizaun atu entrega hikas ba povu hodi vota tuir konxiénsia. Nune'e hili hodi ukun povu ho dignu. Tanba ne’e, lider AMP rasik simu desizaun saida mak foti ona ne’e.

Ne’e duni, Prezidente Repúblika rasik iha inisiativa atu hasoru malu ho Xanana Gusmão atu diskute impase polítika ne’ebé hakat liu ona, maibé Xanana Gusmão rasik laiha ona tempu atu sama-ain iha Palásiu Bairru-Pité.