Koordenadora Rede Defensór Direitu Umanu (RDDU), Laura Afonso de Jesus hatete, husu ba Estadu no polítiku na’in sira atu asegura eleisaun antesipada la'o livre, justu no karakter síviku hodi kontinua promove pás no estabilidade iha TL.

Tanba sira preokupa ba dezenvolvimentu polítika atuál ne’ebé nakonu ho provokasaun no propaganda polítiku ho karakter ofensivu entre lider partidu polítiku sira hahalok sira ne’e iha risku bele hamosu violénsia hodi afeta estabilidade iha rai laran.

“Ami husu ba lider partidu polítiku hotu atu sukat liafuan iha kualkér komunikasaun polítika. Hatudu sentidu edukativu, pás, dame no estabilidade no evita insulta no minimiza malu durante kampaña,” dehan nia, iha Faról-Dili, horisehik.

Nia dehan, sira rekoñese importánsia ba liberdade espresaun iha demokrasia, maibé tenke ho responsabilidade nu’udar mós ezemplu hodi respeita ema seluk nia direitu umanu.

“Ami husu ba lideransa Estadu tomak atu loke-aan ba kritika husi sidadaun hotu, tanba ita boot sira iha papél importante no podér hodi ukun povu ita boot sira nia hahalok no desizaun iha impaktu ba sidadaun sira nia moris”, tenik nia.

Nia dehan, foin lalais iha ona investigasaun ba povu baibain balu ne’ebé iha akuzasaun relasaun ho opiniaun ne’ebé sira hato'o ba públiku, maski kódigu penál la inklui krime difamasaun.

Maibé sira nia intensaun laiha hodi hanorin lider sira la’ós mós atu trava liberdade espresaun, maibé nu’udar obrigasaun atu fó hanoin hodi bele promove debate saudavel entre lider polítiku sira hotu iha eleisaun antesipada duke minimiza no insulta malu maibé nia valór ba povu laiha.