Kandidatu PR númeru 5 hatete, iha Munisipiu Ainaro iha fatin turizmu ne’e barak, hanesan turizmu ekolijia no relijiozu.
Nia hatutan, hanesan iha turizmu Ramelau ne’ebá atria tebes turista sira husi rai laran no turista internasional sira.
“Ha’u-nia hanoin iha Ainaro ne’e iha fatin turizmu ida ne’ebé barak hanesan turizmu ekolojiku no relijiozu, tanba ita foho Ramelau ne’e atrai tebtebes. Nune’e, hanesan Prezidente Republika sei koalia ho governu atu bele tau atensaun ba fatin turizmu sira,” dehan nia liu husi kampaña door to door, iha Postu Ainaro Vila, Tersa (08/03).
Aleinde atu promove fatin turizmu sira ne’e, presiza mós hasa’e kapasidade atrasaun nune’e bele atria vizitante sira, la’ós de’it atrai turizmu domestiku rai laran, maibé mós bele atrai turistas internasional sira.
Ho nune’e, tenke investe liu tan, atu asesu ba fatin turistiku ne’ebé di’ak no aseguradu.
“Tanba ne’e hanesan Prezidente Republika ha’u sei fó poder influénsia ba governu atu kada Munisípiu, ha’u sei uza nia prioridade rasik hodi iveste no halo transformasaun loloos,” nia promete.
Molok ne’e, Koordenadora Klibur Feto PDRT Ainaro, Romana Pereirra hatete, iha Munisipiu Ainaro iha fatin turizmu barak, hanesan Ramelau, Dokomali no Bee Tiris, tan ne’e espera katak bainhira Anacleto sai Xefe Estadu sei la haluha ida ne’e.
“Iha parte ida fali tan hanesan Suku Rai, ita-nia na’i-ulun sira barak moris husi Suku Rai, partidu barak ukun ona, maibé dezenvolvimentu seidauk lao. Tanba ne’e ha'u husu de’it ba ita-boot bainhira ukun keta haluha tau-matan mai situasaun sira hanesan ne’e no labele taka-matan," dehan nia.
