Tuir kandidatu ne’e, area edukasaun no agrikultura sai nu’udar area importante ne’ebé bele kontribui ba dezenvolvimentu nasionál.

“Ita tau ona iha programa kandidatura prezidensial nian mak programa hirak ne’ebé politikamente iha nivel aas tebes, maibé ba vida pratika nian mak sei apoiu governu hodi kontinua nafatin, primeiru liu sei fó prioridade ba área edukasaun no área agrikultura nian,” dehan nia iha kampaña door to door iha Aldeia Loo-Qeu, Suku Debus, Postu Administrativu Suai Vila, Munisipiu Kovalima, Kuarta (09/03).

Hanesan Prezidente Repúblika, nia hatutan, sei esforsu atu hetan poder politik iha área edukasaun, agrikultura no obras publika nian atu bele kanaliza nia hanoin no programa ida ne’ebé di’ak ba nasaun hodi hasai povu husi kiak no mukit.

Tuir kandidatu númeru 5 ne’e, eleisaun iha 19 Marsu ne’e sai mós hanesan sasukat ba forsa partidu nian.

“Tanba ne’e ita buka servisu maka’as atu hetan votus maka’as. Nune’e ita-nia programa politik ne’e, programa ida kona-ba vida sosial nian ne’e bele hetan konsiderasaun iha nivel alto no ita bele aprezenta ona ba governu ka 2023 eleisaun parlamentar nian,” dehan nia.

Anacleto hatutan, bainhira PDRT hetan votus maioria, sei eleva programa sira ne’e ba governu hodi bele loke tan postu traballu iha área kooperativa nian.

Iha fatin hanesan, Koordenador Postu Suai Vila, Estevanus Amaral, husu ba kandidatu Prezidente Republika númeru 5 atu bainhira eleitu nu’udar Prezidente Republika koalia ho governu hodi tau-matan mós ba juventude sira iha Munisipiu Kovalima, liu-liu haree ba edukasaun no desportu.

Enkuantu, nia mós hato’o prekupasaun kona-ba fasilidade desportu nian.

“Ami iha kampu futebool dala-ruma atividade eventu desportu nian iha eskola no mós hala’o iha munisipiu, ami hakarak tuir maibé ami laiha ekipamentus hanesan farda no bola. Ida ne’e mak ami hakarak husu,” dehan nia.

Iha sorin seluk, lia-nain PDRT Munispiu Kovalima, João Kandidu Alves hatete, durante ne’e, vota ba partidu boot sira atu dezenvolve nasaun no dezenvolve povu ba moris di’ak maibé realidade la hatudu.

“Ha’u ne’e tinan hirak ona hahú husi 1975 to’o agora seidauk hetan buat ida, ha’u vota bebeik ba partidu raksasa sira atu moris di’ak, maibé ha’u fila tánat de’it,” dehan nia iha Aldeia Lohorai, Suku Matai, Postu Administrativu Maukatar.

Enkuantu, nia husu ba komunidade sira iha Suku Matai, atu vota ba kandidatu númeru 5 atu bele halo mudansa hodi lori povu sai husi mukit ba moris di’ak.