Enkuantu, ba Prezidente Republika, Anacleto haktuir, sei modernaliza no profesinaliza forsa defeza no seguransa liu husi meius ida hodi halo mudansa ba sira-nia hahalok, laos de’it suvestifikasaun ka ekipamentu modernu ba sira atu uza, maibé liu-liu atu muda sira-nia karater.
Atu bele iha maneira atuasaun laos de’it bazeia ba sira-nia treinu, tanba aleinde sira polisia ka militar sira mós hanesan sidadaun TL, nune’e maneira ida atuasaun ne’e tenke amigavel ba komunidade.
Ba kestaun ne’e, nia hatutan, sei halo liu husi maneira barak no kooperasaun husi país dezenvolvidu sira ne’ebé sira-nia area defeza-seguransa di’ak no professional ona, nune’e buka atu aprende husi sira.
“Hanesan Prezidente Republika saida mak ita hanoin ona atu halo mak hahú daudaun ona hamosu fundu ba eskola ida kona ba kolejiu militar hanesan iha Portugal ne’ebá, ne’e par komesa daudaun ona eduka ona formasaun karater ne’e, hahú kedas husi nivel infansia nian, kuandu sira atinze ona idade maior, assume ona knar iha militar ka polisia, sira iha profisaun ida ne’ebé laos ona hakfodak atu halo rekrutamentu. Tanba de’it, dezempregu barak-barak rekruta, maibé sira iha duni ona karater militar no polisia nian ne’ebé sira aprende komesa kedas husi kiik to’o boot,” nia esplika.
Tanba ne’e, Kandidatu númeru 5 ne’e akresenta, ho maneira sira hanesan ne’e mak bele realiza profesionalizasaun forsa defeza no seguransa.
Nia haktuir, klaru katak, iha knar seluk nasaun nian obrigatoriamente ne’ebé iha duni legalidade atu kaer forsa no kroat ba defeza nian, maibé mós tenke akompaña ho sira-nia komportamentu sosial iha dezempeñu ka atuasaun iha komunidade nia leet.
Hakarak Nasaun La’o ba Oin, Vota Anacleto
Entretantu Sekretariu Jeral Partidu Demokratiku Republika Timor-Leste (PDRT), Matias Boromeu, husu ba militantes Partidu ne’e atu vota ba kandidatu númeru 5, nune’e bele lori nasaun ba oin.
Tuir Matias, kandidatu PR ne’ebé PDRT apoiu iha duni kapasidade atu bele lidera estadu Timor-Leste no kontribui di’ak liu tan ba dezenvolvimentu rai no povu ida ne’e.
“Mai ita hamutuk ho nia (Anacleto) ita lori nasaun ba oin,” dehan nia durante kampaña ba kandidatu PR Anacleto iha Kailaku, Munisipiu Bobonaro, Sabadu (07/03).
Iha fatin hanesan, fundadór PDRT, Gabriel Fernandes husu mós ba militante sira atu vota ba Atsabe oan, atu sai Prezidente Republika, nune’e bele halo mudansa ba rai ida ne’e.
“Lakon ka manan ita dudu partidu PDRT ba oin no ha'u husu ba ita hotu vota ba dezenvolvimentu nasaun ida nian,” dehan nia.
Entretantu, Kandidatu PR Anacleto iha ninia intervensaun hatete, PDRT hanesan, partidu ne’ebé foun no joven, nia membru no militante joven mak barak, maibé sura joven empregadu sura ho liman fuan de’it, enkuantu, dezempregu rihun ba rihun.
Tanba ne’e, nia dehan, situasaun ida ne’e tenke muda no hanesan partidu ne’ebé nia militante joven, kaer ba realidade partidu nian hodi halo mudansa iha nivel nasional.
“Ita nia hanoin ne’e minimu liu munisipiu ida tenke iha fabrika ida atu nune’e bele absolve joven hotu iha kada munisipiu, labele sai fali konsentrasaun dezempregu nian iha Kapita Dili. Maibé bainhira ita loke ona fabrika ka industria iha munisipiu, automatikamente sei dada fali joven sira ne’ebé la hetan servisu iha Dili, mai fali nia munisipiu atu atu bele servisu,” dehan nia.
Bainhira ukun, nia hatete, la’os de’it atu lori PDRT nia ema mak ba servisu, maibé atu muda realidade no fó apoiu ba servisu ne’ebé nasaun Timo-Leste halo iha li’ur atu bele atria investimentu atu mai, hodi bele loke fabrika ka industria barak-barak iha rai ida ne’e.
Aproveita kampaña ne’e, PDRT fó posse ba estrutura sira husi nivel aldeia, suku no postu ho objetivu atu hametin estrutura iha baze nune’e bele hala’o servisu ne’ebé di’ak liu tan liu husi sosizalizaun ba komunidade no simpatizantes sira.
