Xefe Estadu ezerse funsaun ne’e bazeia ba Konstituisaun RDTL Artigu 88, númeru 4 ne’ebé hateten “Iha p5razu loron haat nulu (40) nia laran sura husi diploma naran ida governu nian atu promulga, Prezidente Repúblika bele promulga eh uza ninia direitu vetu, hodi hakerek ba Governu nia vetu katak sa”.

Komunikadu ne’ebé diáriu ne’e asesu deklara, Prezidente Repúblika konxiente Governu atuál presiza duni diploma ne’e hodi asegura liután knaar governu nian. Tan ne’e Xefe Estadu esforsu hodi promulga lalais diploma ne’e.

Proposta Dekretu Lei ne’e atu regula organizasaun no funsionamentu governu nian no mós estabelese kompeténsia ministériu sira iha estrutura Governu VIII nian.

Antes ne’e, Prezidente Repúblika, Francisco Guterres ‘Lú-Olo’, kestiona kona-ba lei orgánika Governu nian. Ne’e duni, husu ba Primeiru Ministru, Taur Matan Ruak atu hadi’a fali lei ne’e.

“Prezidente Repúblika bolu ha’u haree iha Lei Orgánika Governu nian iha buat balun ne’ebé Xefe Estadu hakarak ami hadi'a”, tenik nia, hafoin enkontru regulár ho Xefe Estadu, iha Palásiu Prezidensiál, Bairru-Pité, foin lalais ne’e.

Maski nune’e, Primeiru Ministru lori informasaun balun ba Xefe Estadu hodi ajusta ba Lei Orgánika ne’e antes hetan promulgasaun.

Nia esplika, Orsamentu Jerál Estadu (OJE) prioridade ba Governu, maibé importante liu maka Lei Orgánika Governu nian, tanba laiha maka sei difikulta ba servisu governu nian iha ezekusaun OJE.

PM Taur konfesa katak, Xefe Estadu mós kompromete atu promulga Lei Orgánika ne’e iha tempu badak nia laran bainhira hetan ona revizaun husi Governu.

Nia esplika, Governu hakarak halo buat hotu-hotu tuir konstituisaun tanba ne’e forma ida atu apoiu Prezidente Repúblika hodi bele promulga lalais dokumentu ka orsamentu ruma ne’ebé aprezenta.