Akadémiku Universidade Nasionál Timor Lorosa’e (UNTL), Fakuldade Siénsia Sosiais, Víctor Soares hateten, hafoin simu pose membru governu sira iha devér atu komunika ho funsionáriu públiku sira hodi aselera servisu mákina estadu nian.

Nune’e, nia dehan, durante fulan tolu membru Governu toma pose, Xefe Governu presiza avalia kapasidade membru Governu sira liu husi relatóriu servisu durante mandatu.

“Iha loron 100 Primeiru Ministru atu sukat ona membru Governu nia kapasidade lideransa durante kaer pasta iha Instituisaun Governu”, dehan Víctor, iha Kampus UNTL, Kaikoli-Dili, horisehik.

Nia dehan, nune’e iha avaliasaun ne’e Primeiru Ministru tenke deteta kazu fundamentál ne’ebé ministériu enfrenta, nune’e enkaixa iha programa hodi aprezenta iha diskusaun Orsamentu Jerál Estadu (OJE) 2019.

Ne’e duni, nia otimista katak Xefe Governu sei halo avaliasaun hodi tetu kapasidade membru Governu sira, bainhira Governu kompleta loron 100.

Iha fatin ketak, Ministru Reforma Lejizlativa Asuntu Parlamentár, Fidelis Magalhães dehan, kona-ba loron 100 ne’e normál ba membru Governu sira, tanba Governu kontinua iha kometimentu atu estabelese kompromisu polítika.

Nia dehan, laiha regra konstitusionál atu ezije membru Governu sira atu halo servisu durante loron 100 nia laran, maibé ne’e hanesan tradisaun ba nasaun sira ne’ebé utiliza demokrasia iha kontinentál sira.

Nune’e, antes loron 100 VIII Governu kompleta ona programa Governu, transfere ona orsamentu fundu petrolíferu ba kofre estadu, nune’e iha tempu badak nia laran sei halo diskusaun OJE 2018.

Tanba ne’e, Governu la aprezenta programa servisu loron 100 ba Primeiru Ministru, tanba membru Governu sempre hasoru malu ho Xefe Governu iha enkontru konsellu Ministru kada semana.