Xefe Governu kontinua ulun toos no sei la troka kandidatu membru governu na’in sia (9) ne’ebé aprezenta ona ba Xefe Estadu no rejeisaun.

Tanba VIII Governu sustenta husi Aliansa Mudansa ba Progresu (AMP) ne’ebé kompostu husi partidu CNRT, PLP, KHUNTO, FM/Uniaun Demokrátiku Timorense.

“Ha’u sei la troka sira na’in sia (9) ho ema seluk, tanba partidu sira ne’e iha kandidatu mai governu,” tenik Taur, iha Palásiu Prezidensiál, Bairru-Pité, horisehik.

Nia dehan, kandidatu membru na’in tolu hanesan Alfredo Pires, Rogério de Araújo Mendonça no Samuel Marçal adia simu tomada de pose tanba solidariedade ba malu.

“Sira la toman pose, ohin, Kinta (16/08). Ha’u kontinua ko’alia ho Prezidente Repúblika atu buka solusaun. Tanba ne’e, restante ne’e hein saida maka akontese”, dehan nia.

Kona-ba estabilidade governativa relasiona ho pose kandidatu membru governu ne’ebé pendente, PM Taur dehan, laiha ameasa tanba programa governu pasa ona, orsamentu duodesimu ba Jullu no Agostu mós liu ona.

“Agora ita iha osan ona. Agora ita atu avansa fali ba Orsamentu Jerál Estadu 2018 nian no tempu badak sei avansa tan ba OJE 2019”, tenik nia.