Tanba tuir nia katak, partido ida ne’ebé manan, povu hot-hotu mak manan liu husi servisu hamutuk hodi dezenvolve nasaun ba futuru.

“Apela ba hotu-hotu vota ho konsiensia no independetemenete partidu ida ne’ebé manán iha eleisaun ne’e ita hotu manán tanba tinan lima oin mai ita hotu mak seiserbisu hamutuk no partidu ida ne’ebé de’it, konserteza sei fó liman ba sidadaun hotu-hotu ba povu tomak atu nafatin kontribui ba prosesu dezenvolvimentu ita nia rain,”apela Primeiru Ministru hafoin fó nia votu akompaña husi nia espoza, iha Sentru Votasaun Akadiruhun, Díli 22 Jullu 2017.

Hanesan Xefi Governu, nia orgullu tebtebes ba komportamentu síviku sidadaun hotu-hotu nian iha Timor-Leste laran tomak hahú kedas husi prosesu eleisaun Prezidente Repúblika mai to’o kampaña eleitoral ba eleisaun parlamentar ida ne’e.

Durante kampaña ne’e povu eleitores sira hatudu katak sira simu ona diversidade de ideias, simu ona pluralizmu iha opsaun polítika ne’ebé sidadaun Timor-Leste iha.

“Prova konkreta mak durante kampaña ita ba iha fatin barak haree iha populasaun nia uma bandeira husi partidu oioin mak hamrik iha uma sorisorin maibé laiha relatu kona-ba violénsia, abuza malu ka akuza malu, ne’e hotu hatudu katak Ita nia demokrasi saudável no iha ona maturidade,”afirma Xefi Governu ba media sira iha Sentru Votasaun.