KELIKAI: Partidu Libertasaun Populár (PLP) promete muda polítika governasaun atual ba konstrusaun estrada ho sistema loke kuak, taka kuak bainhira kaer ukun iha períodu 2017-2022.
Prezidente PLP Taur Matan Ruak dehan durante tinan 15 partidu polítiku balun ukun,maibé laiha mudansa ba polítika iha setór infra-estrutura ne’ebé kontinua uza sistema loke kuak, taka kuak ho orsamentu boot, maibé laiha kualidade.
Taur dehan, Timor iha eleisaun ba dala-3, maibé saida mak akontese estrada at hanesan loos membru governu sira nia oin mak projetu kee kuak taka kuak no lori tan tahu ba taka estrada.
Nia dehan, sira halo estrada no portu, maibé povu la gosta nafatin tanba povu husu ida sira fó fali ida.
“Aeroportu internasionál rua iha Suai no Oekusi , Primeiru Ministru dehan Suai nian atu tula mina entaun Oekusi nia atu tula bee”, dehan nia liu husi komísiu polítika iha kampaña aberta munisípiu-Baukau, Sesta (14/07).
Atu muda sistema loke kuak taka kuak, Eis Prezidente ne’e dehan, bainhira lidera governu sei aloka OJE ba kada Munisípiu ho montante rihun $60.
Tanba, PLP hakarak halo dezenvolvimentu hahú husi baze tanba governasaun ida ne’e halo diskriminasaun ba Munisípiu sira.
“PLP barani fó Munisípiu ida rihun $60 kada tinan ida no iha tinan lima nia laran fó rihun $300 ne’e ba munisípiu ida”, dehan nia.
Polítika PLP mak kada munisípiu 13 sei simu rihun $900 tanba sei Prezidente Repúblika promulga orsamentu hamutuk biliaun $8.5
“Gasta ba tinan lima nia laran halo buat ne’ebé sira gosta no gasta ba projetu sira ne’ebé imi la hatene osan ne’e sei fila fali mai ka lae?”, dehan nia.
Lalika Gaba Aan
Eis Prezidente Repúblika ne’e dehan, iha kampaña lejizlativa ne’e haree ema barak komesa mosu mai dehan nia mós halo funu.
“Ohin iha Timor ema balun gaba aan dehan nia mak funu maka’as ne’e bosok teen, uluk kuandu ita terus sira nia oin ita la haree no funu hotu sira mak halai uluk uluk ne’e sira moe laiha ukun tiha ita tee no mii tan ba ita nia leten”, dehan nia.
“Tinan 15 sira hatama osan ba hotu sira nia bolsu ema ida la barani atu ko’alia ho sira maibé ohin sira hasoru ema ida bulak hanesan Matan Ruak ne’ebé barani fera sira iha ema barak nia oin”.
Tanba ne’e, nia dehan, tempu too ona povu timor labele dukur atu kontinua fó oportunidade ba ema sira ne’ebé hakarak uza oportunidade hodi hariku aan deit.
Hadau Bola Merah ho CNRT no FRETILIN
Taur dehan, PLP moris atu buka lia loos no justisa.
“Ita sei hadau malu bola merah ho partidu boot rua FRETILIN ho CNRT iha loron 22 Jullu ne’e, tanba PLP moris atu buka lia loos no buka justisa,” dehan Taur iha nia kampaña aberta iha Postu Administrasaun Venilale –Baukau.
PLP nu’udar partidu foun, maibé nia bele kompete ona hodi doko partidu boot rua ne’ebé ukun ona nasaun ida ne’e.
Iha fatin hanesan, Veteranu Antigu Kombatente Terra Bulak hateten, di'ak liu povu fó fiar no votu ba PLP atu lori Taur Matan Ruak ba Primeiru Ministru VII hodi fó moris di’ak ba povu TL.
Halo Uma ba Povu Kiak
Taur karik Povu fó fiar hodi ukun ba períodu ida ne’e sei hadi'a uma ba povu kbiit la’ek sira.
PLP manan sei halo uma estadu (perumahan) iha vila laran hodi fó ba povu kbiit laek sira hela, ba profesora sira hela, F-FDTL sira hela, maibé sira selu to’o hotu uma sai sira nia kusta ona.
“Inan Aman sira selu la hotu oan selu, oan selu la hotu bei oan selu, selu kotu uma ne’e sai ninian tiha”, dehan nia iha Postu Administrasaun Venilale.
Nia dehan daudaun ne’e, akontese iha Dili governu halimar halo eviksaun ba populasaun sira nia hela fatin.
