Prezidente Partido Os Verdes de Timor (PVT), Antonio ‘Lela Hunu’ Cruz, husu ba estrutura PVT tomak atu labele halo insultu ba partidu Fretilin, inklui ba nia lider sira, no mós Xanana Gusmão.
“Ha’u husu ba lider Os Verdes sira, respeita ba Fretilin no hakruk ba Xanana, ita laiha inimigu, ita-nia inimigu mak dezempregu, tanba partidu Os Verdes hamrik defende ba joven barak ne'ebé laiha servisu," deklara Antonio iha abertura kampaña PVT iha kampu futebol Munisipiu Aileu, Kuarta (19/04).
Tuir nia, Partidu Fretilin mak nu’udar inisiadór istória ba ukun rasik an no Xanana nu’udar kontinuadór ba luta libertasaun Timor-Leste nian.
“Ida ne’e istória mak hatete, laiha ema ida muda no labele nega ida ne’e,” nia afirma.
PVT, nia hatutan, mai husi joven dezempregu sira ne’ebé tau forsa hamutuk, tan ne’e PVT sei luta no defende joven dezempregu sira-nia futuru.
“Lalika tauk no taridu, Os Verdes prepara ona atu firme hodi sai matan, tilun no ibun ba joven dezempregu iha rai ida ne'e, tanba joven sira ne'e mesak Fretilin nia oan no Xanana Gusmão nia oan mak mai hamutuk iha Os Verdes," deklara nia.
Durante ne’e, nia hatutan, partidu boot sira uza joven sira-nia votus hodi hariku sira-nia an no sira-nia familia, tanba ne'e joven barak ne'ebé sai vitima deside tama iha PVT.
Tan ne’e, nia husu ba inan-aman sira ne'e nia oan laiha servisu atu fó konfiansa ba PVT hodi bele rezolve kestaun dezempregu iha Tmor Leste.
"Partido Os Verdes la boot hanesan partidu Fretilin no CNRT, partidu ne'e kiik, bolu hamutuk joven husi Fretilin nia oan no Xanana nia oan, mai hamtuk ho inan-aman sira faz parte ba luta Os Verdes nian."
PVT, nia hatutan, iha vizaun boot atu luta ba emar sira hodi sai husik mukit no susar.
Daudaun ne’e, Antonio informa, PVT produs ona sertifikadu dezempregu ba Joven rihun 80 iha Timor Leste laran tomak.
Bainhira PVT kaer ukun, nia dehan, sei tau-matan ba joven sira ne’ebé simu sertifikadu refere atu ba servisu iha nasaun seluk bazeia ba kooperasaun ne’ebé sei halo.
Atu bele oferese kampu servisu ne’ebé barak liu tan, nia dehan, PVT mós sei fó apoiu ba Xanana Gusmão hodi dada kadoras mina nian mai Timor Leste.
PVT, nia hatutan, sei sai movimentu ne'ebe boot hodi luta defende joven sira ne’ebé laiha servisu no luta ba kombate violensia entre joven ho joven.
Ba munisipiu Aileu, Prezidente PVT ne’e hatete, bainhira hetan konfiansa hodi kaer ukun, sei harii sentru formasaun ba joven dezempregu sira iha munisipiu refere.
Iha fatin hanesan, Prezidente PVT Munisipiu Aileu, Gil Martins hatete, PVT nia luta hahú kedan ona dezde tinan 2019.
Durante tempu ne’e, nia hatutan, partidu politiku seluk uza PVT hanesan sira-nia instrumentu.
PVT, nia hatutan, labele fó ona tempu ba Fretilin no CNRT ne'ebé ukun tiha ona hodi kontinua hanehan joven sira.
Entretantu, iha kampaña ne’e hetan observasaun husi ekipa Komisaun Nasional Eleisasun (CNE) no Sekretáriu Tekniku Admistrasaun Eleitoral (STAE), no hetan mós seguransa masimu husi Polisia Nasional Timor Leste (PNTL) Munisipiu Aileu.
