“CNRT iha nia vizaun ba tinan 30, ita mak kaer, tinan hirak mai ne’e, ita tenke halo, revizaun oan ida, tanba tinan haat ka lima nia laran, buat ida la akontese, ita tenke halo fali, hadi’a fali, hodi ajuda ita nia ekonomia la’o ba dezenvolvimentu longu prazu,” haktuir komunikadu ne’ebé Online INDEPENDENTE sita, tersa ne’e (10/01).
Lakunas ne’ebé líder partidáriu ne’e nota dezde 2017 mak, violasaun ba regras konstitusionál durante mandatu Eis-Prezidente Francisco Guterres Lu-Olo no garante katak, Prezidente José Ramos-Horta ne’ebé CNRT rasik mak apoia nu’udar prezidente ba povu tomak, bele koriji violasaun ne’ebé akontese.
Efeitu husi violasaun ne’e mak, frajilidade estadu direitu demokrátiku no resesu estabilidade ekonómika dezde CNRT la tama iha governasaun.
“Ema barak ne’ebé apresia ita, tanba ita la’o di’ak oituan, mai hasoru ha’u dehan nune’e, señor, Timor halo ami hakfodak fali, tanba sa? Tan nia la’o di’ak oituan, neneik la’o tiha, agora ne’e la’ós para lae?, hakiduk fali, ema dehan ohin loron, iha persepsaun internasionál, embaixadór sira iha ne’e ko’alia, ei kuitadu, imi hakiduk tiha fali,” lamenta Xanana Gusmão.
Falla iha implementasaun programa sexta bázika, hanesan sintomas ida husi falla husi governasaun atuál.
“Se lae, ita manán maioria absoluta mak mai tan ida-ne’e, ida ne’ebá mak ita halo sesta bázika ho hudi matak, agora, foin lalais ami liu husi fatin ida, iha ne’ebá ema hobur hudi matak para barak no orse’ik gabinete sira mai husi tasi mane, nakonu ho hudi matak,”fundamenta Xanana.
Entretantu, atu hadi’a governasaun no hatu’ur hikas rítmu husi dezenvolvimentu ekonómiku mak, Xanana Gusmão dezafia kuadru no militante partidu atu konsolida partidu, hodi manán ho maioria absoluta iha eleisaun tinan ne’e.
Tanba tuir Xanana, partidu CNRT, hanesan lalatak husi CNRT “Conselho Nacional de Rezisténsia Timorense” hodi liberta nasaun no komprometidu atu liberta povu.
“Ita hotu hakarak katak, CNRT kaer ukun, ukun ho di’ak, ukun ho povu, ukun ho dezenvolvimentu hodi hare rai ida-ne’e, ita tenke servisu maka’as,” hateten Eis Primeiru Ministru ne’e.
