Tuir informasaun, iha Kuarta (23/03) tuku 2 madrugada, eis Tanente Jeneral F-FDTL, Lere Anan Timur, ba hasoru-malu ho Xanana iha fatin ida iha kapital Dili.

Maske seidauk klaru asuntu ne’ebé koalia iha enkontru entre lider na’in rua ne’e, maibé iha mós espekulasaun katak, enkontru refere relasiona ho pozisaun Lere nian iha ronde daruak eleisaun prezidensial.

Entretantu, iha deklarasaun Diretór Kampaña kandidatu PR númeru 6, Francisco Guterres Lú Olo, José Manuel ‘Nakfilak’ liu husi konferensia imprensa, horseik, hatete, uluk kedan Lere Fretilin no to’o ohin sei Fretilin nafatin.

“Nanis kedas nia sei tau farda deklara dehan nia Fretilin, agora mak nia la’os Fretilin fali ne’e, ne’e ema seluk mak hatete, ami nunka hatete. Nia kontinua Fretilin i nia sei mai hamutuk ho ami atu lori vitoria ba kandidatu Lú Olo,” deklara Nakfilak liu husi konferensia imprensa iha sede kandidatu Fretilin, Luz Clarita, Bairo Formoza, Dili, Kinta (24/03).

Hatan kona-ba saida mak Fretilin halo hodi konvense fali militante sira ne’ebé iha ronde dahuluk fó apoiu ba Lere, Nakfilak dehan,

“Resposta mak ida ne’e, agora kandidatu uniku de’it, signifika sira hatene sira-nia kandidatu mak see, laiha tan rua, sira rasik mak sei manan konsensia hodi lori votus mai Doutor Francisco Guterres Lú Olo,”

Kona-ba aprosimasaun ba kandidatu PR na’in 14 seluk ne’ebé la pasa ba ronde daruak, Nakfilak dehan, nia parte hasoru-malu ona ho kandidatu hotu-hotu.

“So que ami nunka harak halo kontaktu ne’e iha facebook, ami la’o tuir posibilidade ne’ebé iha, kuaze maioria kandidatu iha primeira volta ne’e ami halo aprosimasaun hotu, vontade di’ak, hakarak atu koopera,” dehan nia.