Nia husu ba militante no simpatizante munusipiu Covalima, atu hamriik metin ho kandidatu númeru sorteiu neen hodi manan dala ida tan.

"Prontu ka lae hamriik metin ho ha'u atu hakat dala ida tan ba prezidente republika", nia husu.

Konstituisaun Repúblika Demokrátika Timor-Leste nu'udar estatutu públiku povu Timor-Leste nian, hodi bele hakruuk tuir no lei sira hotu.

Hamriik iha Palku Labele Insulta

Iha fatin hanesan, pontu vokál kandidatu Lú Olo husi Munisípiu Kovalima, Francisco da Costa, husu ba kandidatu sira bainhira hamriik iha palku leten tenke iha maturidade polítika, labele insulta malu maibé hato'o de'it mak sira-nia programa ba tinan lima nian.

"Ita ko'alia kona-ba interese povu nian, dezenvolvimentu nasaun nia vida ne'e mak interese ba kandidatu hotu-hotu," dehan nia.

Maibé, sira mós hatene sira-nia aan katak kandidata ba Prezidente Repúblika katak atu asegura parte hotu-hotu ne'e mak nu'udar sidadaun timoroan  atu kandidata ba Prezidente Repúblika.

Iha fatin hanesan, ekipa susesu Lú Olo, Lusinho do Rego hateten, bainhira re-leitu dala ida tan ba Prezidente Repúblika, primeiru sai PR ida ne’ebé hakruk de'it ba Konstituisaun RDTL, labele hakruk ba lider ka ema ruma ka partidu. Hatuur Konstituisaun atu fó espasu ba Governu atu halo dezenvolvimentu.

"Ha'u hanoin durante ne'e kandidatu Lú Olo, durante periodu kampaña la halo insulta malu, hato'o de'it mak nia programa no vizaun polítik ba tinan lima nian," haktuir nia.

Suai Oan 6.200 Fó Apoiu

Kandidatu Francisco Guterres Lú Olo hateten, Suai oan hamutuk 6.200 mak fó apoiu ba Prezidente Repúblika periodu 2022-2027.

"Ha'u mai hanesan kandidatu ba Prezidente Repúblika dala ida tan 2022-2027 ho ha'u-nia deklarasaun ne'e iha loron 16 Janeiru kotuk liuhusi vontade timoaroan hamutuk 6.200 mak hakarak mak tebes ha'u atu sai fila-fali kandidatu sira pertenente ba kandidatu ida inkluzivu sira hotu ho Suai nian," dehan Lú Olo.

Iha fatin hanesan, Iha fatin hanesan, ekipa susesu Lú Olo, Lusinho do Rego hateten, sira mobiliza apoiante sira 1.500 mak partisipa kampaña.

"Total Militante iha Munispiu Suai, mobilizasaun ne’ebé iha ami sei mobilza ema rihun ida atus lima ba iha postu suai, tanba tuir targets ne’ebé mak iha mobilizasaun masa másimu ne’e iha postu haat de'it, hanesan Suai Vila, Zulamai, Tilomar, Maukatar," dehan nia.

Iha fatin hanesan, Pontu Vokál Munisípiu Suai, Francisco da Costa hateten, ba kandidatu Lú Olo, Suai garantia la 100% maibé 50% sei manan iha Kovalima, tanba durante ne'e mobiliza iha baze ne'ebé sira hatene di'ak liu katak massa ne'e preparadu durante kampaña no eleisaun, antes mós preparasaun ne'e 80%.

"Lú Olo re-eleitu fali ne'e inisiativa husi militante rasik, bainhira ami halo konferensia iha munisipal ami halo deklarasaun katak husi Komité Sentrál FRETILIN ne'e só úniku Lú Olo mak ami kandidata," haktuir nia.

Nia esplika, iha ema balun na'in haat, lima husi FRETILIN mak kandidata an maibé úniku iha FRETILIN ne'e desizaun husi Komité Sentrál FRETILIN ne'e só úniku Lú Olo mak kandidata sira seluk ne'e husi FRETILIN maibé la liu husi Komité Sentrál FRETILIN.

Nune'e mós, Diretór CNE Munisípiu Kovalima, Hermenejildo de Sena hatete, kampaña Francisco Guterres Lú Olo, iha Suai la'o hakmatek mezmu sira hatur oráriu oras tuku 10 hetan konkordansia ho ekipa susesu, informasaun sira relata ona ba CNE kona-ba aumenta oras balun ligadu ba kampaña ne'e hala’o atraza.

Husu Apoiu Ba Ainaru Oan

Kandidatu Francisco Guterres Lú Olo, abertamente husu ba povu Munisípiu Ainaru atu vota tanba dala ida hodi re-eleitu Prezidente Repúblika periodu 2022-2027.

"Hamutuk fali ho ha'u Lú Olo kandidatu PR dala ida tan, ha'u fiar maun-alin sira iha Munispiu Ainaru ba imi nia konfiansa ha'u mai dala ida tan atu fó hatene ba povu Ainaru ha'u re-kandidata-aan dala ida ba Prezidente Repúblika ba nasaun Timor-Leste," dehan Lú Olo, iha kampu futeboll, Munisípiu Ainaru-Villa, horisehik.

Nia dehan, bainhira sai PR ba povu Timor-Leste tomak sei la halo diskriminasaun ba povu tomak, sei haree povu Timor-Leste hanesan maun alin ida no hanesan ema ida, ho ida ne’e sei kaer nafatin Unidade Nasionál povu Timor-Leste nian.

"Ha'u sei sai Presidente Repúblika ida atu kumpri de'it Konstituisaun RDTL nian, la kumpri ema ida nia vontade, katak Konstituisaun RDTL mak lei inan, as liu iha nasaun ida ne'e, Presidente Repúblika jura, kumpri Konstituisaun no lei sira hahú nia mandatu haree ba Lei sira,tanba ne'e Lu olo manan tan dala ida Jura tan dala ida," tenik nia.

Nia hatete, jura para hotu-hotu ba Konstituisaun nia oin signigika hotu-hotu obvedese ba  lei, estadu rasik hakruk ba lei signigika laiha ema ida iha estadu lei nia leten, Prezidente Repúblika sei la'o tuir ida ne’e.

"Lú Olo eleitu dala ida tan, sei hatene haksumik nia kna'ar hanesan Prezidente Repúblika, katak nia hansesan xefe estadu ne’ebé hetan lejitimidade direta husi povu nia votu ema ida, ida votu fó ba nia, povu vota nia atu hola desizaun, tuir kompeténsia Konstituisaun ne’ebé fó ba nia simu , maibé nia mós simu katak nia representa estadu nia.