Co-Prezidente Troika Lideransa FRETILIN, Lere Anan Timur hatete, partidu FRETILIN partidu istóriku sei fahe programa ba hot-hotu to'o baze.
"Imi sei haree programa saida mak FRETILIN sei halo kuandu ba kaer ukun, agora partidu hot-hotu iha ne'ebé de'it ko'alia programa dehan lori moris di'ak ba povu. Ida-ne'e la'ós programa foun ba FRETILIN. FRETILIN kuandu hahú funu ninia programa mak ne'e ona, nia komprimisu polítika mak dehan katak lori moris di'ak ba povu. La'ós foin, agora mak Partidu hot-hotu ita bele dehan ko'alia tuir ninia aman no Avo FRETILIN dehan katak Avo dehan moris di'ak ba Povu ami mós dehan moris di'ak ba povu," Deklara Lere, iha Komisiu Partidu Fretilin, Kampu Futebol Ainaro Villa, Domingu (24/4).
Nia afirma, agora Fretilin atu lori moris di'ak ba povu tenke ukun, la ukun labele fó moris di'ak ba povu.
"Ha'u fiar katak kuandu Fretilin ukun la'ós katuas lia na'in sira mak atu ba tuur iha Parlamentu Nasionál no governu. Imi mak sei dudu imi nia oan sira ne'ebé mak agora tuur iha oin ne'e atu ba tuur iha ne'ebá, imi laiha sira sei la bá tuur iha Parlamentu Nasionál no governu," Nia afirma.
Nia haktuir, entaun kuandu dudu sira ba iha Parlamentu Nasionál no governu tenke hateke ba kotuk, ferik no katuas, bibi atan,karau atan, koa tua, to'os nain laiha karik, ohin loron la tuur iha fatin ne'e.
"Ha'u tuur iha ne'e atu serbí Estadu, maibé ohin loron hanoin ida-ne'e dala-ruma fraku ona, se mak tuur iha tuur governu hein to'o tinan-lima," Nia haktuir.
Nia subliña, tanba Tinan-lima manán tiha osan dala-ruma haluha tiha ema ne'ebé mak uluk dudu nia bá tuur iha governu.
"Mais Fretilin mak ukun, ita manán, ita ukun ha'u brani, nu'udar mós lideransa partidu ninian, ha'u brani no ezije, ha'u husu responsabilidade ba Ministru ida-idak, deputadu ida-idak, iha fulan ida-ne'e o halo saida, deputadu iha Ainaro, o haree problema saida, ita labele husik sira la'o livre tuir sira nia hakarak," nia subliña.
Nia salienta, Tinan ida Ministru, tinan seluk halo andar, tinan ida Ministru, tinan seluk nia uma andar iha ona Bali no Jakarta. Enkuantu ema ne'ebé dudu sira ne'e kuitadu dala ruma han meudia mós la hetan kalan mak han dala ida. Ida-ne'e mak Fretilin tenke kombate.
"Ohin ita dehan korrupsaun ka nauk, tanba nauk teen ida labele ba ka'er, nauk teen seluk, oan ida labele dehan katak o buan. Ema ne'ebé mak la nauk teen bele ba kaer naukteen ida," Nia afirma.
"Ohin loron ita Fretilin, dala barak ita ba tuur iha Parlamentu Nasionál, maibé parlamentu nasionál bele dehan korrupsaun laiha, sira ne'e halo lei, dala-ruma sira halo lei ba sira nia aan ne'e iha, maibé sira-ne'ebé mak iha governu ne'ebé ne'e fatin luan ba sira, ha'u nu'udar emprezariu, ha'u ba Ministru, ha'u bele tender ka la'e, bele naran katak fó 10% o bele tuir. Ida-ne'e Fretilin tenke kombate," Nia relata.
Nia informa, ko'alia kona-ba justisa rai laran, mosu injustisa barak, Fretilin funu atu halakon injustisa, hanesan inan sira ko'alia kuidadu justisa ne'e.
"Justisa ba ami kiik sira-ne'e ba imi boot sira-ne'e, imi defende malu ne'ebé imi sala mós imi nian loos hotu. Ami sira kiik ne'e mak sala hela de'it,ami nian loos mós sala. Buat sira Fretilin ba ukun tenke kombate," Tenik nia.
Tuir nia, buat barak ne'ebé la'o lalos iha Estadu nia laran, tanba ne'e hetan fiar husi povu tenke hadi'a sistema sira ne'e.
"Fretilin la'ós partidu atu hakiak ema nauk teen sira, Fretilin la'ós partidu ba ema ne'ebé mak buka de'it kadeira, Fretilin la'ós kadeira nia partidu, la'ós osan nia Partidu. Tanba Fretilin nia misaun mak atu lori naroman ba povu," Nia hateten.
Nia adianta, labele Ainaro nia sai Ministru, bolu de'it Ainaro oan nakonu iha nia Gabinete, Iliomar ba labele ka?, Funu ne'e Ainaro oan de'it mak funu ne'ebé ba Ministru lalin de'it Ainaro oan sira-ne'e.
Tanba ne'e ohin loron iha Ministériu balun kadeira la to'o tán, tenke ba lalin kadeira, dala-ruma balun tuur iha rai, dehan katak funsionariu mate klamar mós iha no osan ne'e la'ós sira nian, osan ne'e mai husi inan-aman sira nia terus, susár no maluk sira ne'ebé mak nia ruin seidauk halot ne'e.
"Ne'e mak aban-bainrua Fretilin tenke brani kombate familiarismu, korrupsaun, nepotismu,abuzu podér, injustisa, atu ita-nia labele sai vitima, ukun aan, Fretilin nia prinsipiu mak ida-ne'e, tanba ne'e mak ita hotu hakarak Fretilin manán," Nia afirma.
Nia fó mensajen mak ida-ne'e Fretilin ukun tenke lori naroman ba povu, la'ós lori naroman ne'e, nauk teen, korrupsaun nakonu, buat aat hotu nakonu, ida-ne'e la'ós naroman ba povu. Maibé naroman ba ema ida ka ema rua nian.
Nia reforsa, Fretilin ukun tenke konsiensia, la'ós. Fretilin ukun tan de'it kadeira no osan, ida-ne'e partidu ida-ne'ebé la hadomi nia rain no la hadomi nia maluk sira ne'ebé mak mate ba rai ida-ne'e.
"Fretilin mak halo konstituisaun, entaun Fretilin mak na'in ba konstituisaun, kuandu ba ukun, tenke tuir lei no konstituisaun ne'ebé mak iha," Nia fundamenta.
