Vise Prizente Partidu CNRT, Gil da Costa Monteiro ‘Oan Soru’ husu atu povu Timor-Leste hili José Ramos Horta sai Prezidente Repúblika.
“Imi-nia votu menitu de’it, tanba imi labele soe imi-nia votus saugate de’it, imi kuandu vota sala, imi matan-been tuun tinan lima, imi kuandu vota loos, imi sei hamnasa tinan lima, kuidadu didi’ak,” dehan nia liu husi kampaña ikus Horta iha Tasi Tolu, Dili, Tersa (15/03).
Oan Soru dehan, iha ema balun daudaun ne’e toba no hader iha Ermera, Atsabe, Letefoho, Hatulia, no fatin seluk hodi fahe osan ba Xefe Aldeia sira $50 no militantes baibain $10.
“Simu osan haan tiha, maibé lalika tuir ona sira, tanba tuir sira imi-nia matan-been sei suli to’o tinan lima, osan ne’ebé fo ba imi, ne’e imi-nia osan, la’os sira fa’an modo mak hetan,” dehan nia.
Iha fatin hanesan, Prezidente partidu CNRT, Kay Rala Xanana Gusmão, husu povu Timor-Leste atu iha 19 Marsu vota ba kandidatu PR ne’ebé iha espíritu matenek atu lidera nasaun hodi hadi’a imajen Timor-Leste iha mundu.
Nia dehan, atu hadi’a Konstituisaun ne’ebé hetan violasaun dala tolu (3) iha mandatu Xefe Estadu ida ne’ebé uluk hakerek mós Konstituisaun iha asembleia konstituiente iha lejislatura dahuluk ikus mai viola rasik, tanba ne’e atu hatuur hikas orden estadu direitu demokrátiku tempu to’o ona halo referendu daruak iha 19 Marsu 2022.
‘’Loron 19 Marsu agora ita-boot sira hotu tenke vota ba númeru 14, tanba Ramos Horta ema ne’ebé matenek koñese mundu ne’e, lori Timor ba mundu no lori mundu mai Timor,’’ nia hatete.
Tuir Observasaun Jornalista Jornal INDEPENDENTE hahú tuku 12 estrada husi rotunda Nicolau Lobato to’o iha Tasi Tolu mosu engrafamentu, tanba motor ho karreta husi militante no simpatizante sira antusiasmu atu partisipa iha kampaña daikus Horta nian.
Iha area Tasi Tolu, ema rihun ba rihun nakonu iha kampu laran no balun buka mahun tanba loron manas, bombeirus karreta rua rega ba eleitór sira, tanba ema barak no loron manas demais.
Hafoin kampaña eleitorál hahú mosu engrafamentu husi kampu Tasi Tolu to’o rotunda Nicolau Lobato kontinua mai to’o Timor Plaza.
Aliende ne’e, Prezidente Partidu CNRT Kay Rala Xanana Gusmão tuur iha karreta leten, la hatais faru, hodi hiit liman ema sira ne’ebé hasoru iha dalan.
