“Ha’u nia vizaun hanesan kandidata bá prezidente Repúblika periodu 2022-2027 mai ho vizaun Ida simples maibé ho ambisioza konsolida independensia promove páz, familia no patria,” dehan nia iha debate públiku, Novu Turismu Dili, tersa (15/03).

Nia dehan, misaun Prezidente Repúblika mak tuir kompetensia ne’ebé konsagra ona iha konstituisaun no sei hala’o misaun ne’e tuir maromak nia hakarak.

Nudar Presidente Repúblika tenki kumpre konstituisaun no garante funsionamentu instituisional atu hametin unidade nasional bá povu timor laran tomak, hodi bele atinje objetivu sira ne’ebé define ona iha artigu 6 konstituisaun RDTL liuliu hodi promove páz, garante estabilidade no bem-estar.

Ho ida ne’e, bainhira nia eleitu bá iha Prezidente Repúblika molok fó nia kompetensia vetu tenki haree espiritu lei, atu nune’e bele proteje sidadaun sira nia direitu.

“Ha’u hanoin kona-bá defamasaun ita nia konstituisaun garante ona kona-bá lei ne’e, tanbá ne’e lei ne’ebé mak atu halo tenke iha baze bá konstituisaun hodi proteje sidadaun sira nia direitu tomak,” dehan nia.