Husu lalikan tauk no hakfodak, hotu-hotu mai iha ne'e balun la mi tanba dook IHA difikuldade Transporte maibe, hein katak sira sei vota ba kandidatu Lere Anan Timur.
"Nia (Lere) ema ki'ak, ita hatete ba maun Lere ami mós ki'ak. Ema ki'ak hili ema ki'ak so ema ki'ak mak bele hatene saida mak ki'ak," dehan Maksakur, iha Same, Sabadu (12/3).
Nia haktuir hili ema terus na'in nia sei hatene saida mak terus, fi'ar katak inan aman sira katak sei lori aman Lere ba Prezidente Republika, tanba ne'e maluk sira ne'ebé iha ne'e labele rona ema seluk tenke fiar aan.
"Loron 19 Marsu ita sei lori aswain Timor ida hodi ba futu, husu ba inan aman sira no Juventude frenti Klandestina hotu liu-liu maluk veteranu sira vota ba iha Lere Anan Timur, Ita hasai manu aswain para ita manan," dehan nia.
Maluk sira hotu presiza hanoin didi'ak atu vota karik ho sentimentu, tanba votu konfiansa ne'e fo ona ba aman sira hotu ukun ona, hela de'it aman Lere entaun tempu ona fo votu ba nia.
"Lalikan hili tan Sira, ha'u Maksakur hamrik iha palku ne'e para Manufahi tenke manan. Iha esperiensia uluk iha maun Xanana ninian ha'u lori ema ba kampana iha Fahi-Nehan, maun Taur Matan Ruak mós ha'u mak sae halo kampana iha Fatin ne'e ikus mai sira Prezidente, ohin iha ne'e ohin hahu Kampana Maun Lere nian ita tenke manan tan," tuir nia.
Maun boot sira ne'ebé vota tiha ona di'ak liu lalikan vota, laiha hanoin ida katak vota ema Ida sai Prezidente Dala rua, mais oportunidade fahe mós ba sira nia alin Lere.
Iha fatin hanesan, Kandidatu Prezidente Republika, Lere Anan Timur dehan, nia ki'ak maibe nia la mesak, sempre iha forsa husi inan aman no patriota sira hotu.
"Inan aman, Maun alin no kompaneiru sira domin no hakuak boot ba hotu-hotu ha'u liu fatin hotu-hotu ha'u dehan katak ha'u ki'ak, ha'u la mai fahe Osan ba Ema idak-idak ha'u la mai promete fahe Osan ba inan aman sira Manufahi tomak maibe ha'u mai husu imi nia domin mai ha'u atu sai aman ba Nasaun," dehan nia.
Domin ne'ebé fo mai sei la selu agora, maibe sei selu ho domin ne'ebé ke nu'udar Prezidente Republika, domin ba ema kiak, Ema aileba no ema ain tanan sira.
"Ha'u sai oan ki'ak iha ha'u nia partidu rasik nia laran la bu'at ida oan nunka hamrik mesak oan ki'ak sempre iha Ema ida ke hamaluk nia, ha'u nu'udar oan ki'ak inan aman hirak no patriota sira mak ha'u nia forsa no apoia, tanba ida ne'e mak ha'u la sente izoladu," tenik nia.
Lere: Manan-Manan Ukun
Kandidatura Prezidente Republika Lere Anan Timur, ho fiar aan deklara, sei manan iha Eleisaun Prezidensial, katak manan mós ukun lakon mós ukun.
Tanba ne'e mak durante kampana samana rua nia-laran sempre husu misa ba matebian eroi sira no vizita sira-nia rate atu sama tuir lider hirak ne'ebé laiha ona nia ain fatin.
"Atu sai Prezidente Republika hanesan saudozu Nicolau Lobato, Francisco Xavier do Amaral, ha'u sama tuir sira ain Fatin. Tanba ne'e, ha'u kandidatu aan prezidente ha'u sei manan. Manan ha'u ukun la manan mós ha'u ukun," dehan nia, iha Aisirimou, Aileu, horisehik.
Nia dehan, lider hirak ne'ebé sei moris debe hela sira ne'ebé mate ona tanba ne'e mak dever obrigasaun sai prezidente Republika tenke lori nasaun ne'e ba progresu dezenvolvimentu tanba sama tuir sira nia ain fatin.
