“Osan ne’e sentralizadu mai husi dotasaun governu no sei hela iha Ministériu Finansas hodi kria ekipa tékniku ida ba servisu ida ne'ebé mai husi unidade aprovizionamentu husi gabinete Primeiru Ministru nian,” dehan Vise-Ministru Administrasaun Estatál, Tomás Cabral, iha knaar fatin, Kaikoli, horisehik.

Nia esplika, preparasaun ba eleisaun Parlamentár ida ne’e mós agora iha lei foun ba STAE ne'ebé hanesan autónomu.

Tomás dehan, STAE agora halo servisu verifikasaun hamutuk hela ho Tribunál Rekursu iha loron 13 Juñu halo ona sorteiu, tanba sira nia formasaun mós preparadu ona.

Entretantu, Ministru Dionísio Babo hateten, preparasaun STAE la’o ona iha tempu finál no partidu polítika sira hodi tama ba iha tempu kampaña nian iha fulan Jullu nia laran.

Tanba agora sira sei hatama lista kandidatu ba iha Tribunál rekursu no sira sei haree hela depois mak sei halo verifikasaun loos ona mak foin fahe kalendáriu kona ba partidu polítiku atu halo kampaña nian.

STAE Loke Resenseamentu Foun iha Nasaun tolu

Sekretariadu Tékniku Administrasaun Eleitorál (STAE) loke resenseamentu eleitorál ba traballadór iha Nasaun tolu kompostu husi Inglaterra, Koreia no Austrália, tanba traballadór barak iha ne'ebá.

Diretór Jerál STAE, Acilino Manuel Branco hateten, espera ho loke resenseamentu eleitorál foun iha Koreia, Inglaterra no Melburne ba eleisaun parlamentár partisipasaun makaas liu kompara ho eleisaun Prezidensiál.

Atu estabelese mós estasaun votasaun depende haree ninia progresu rezultadu husi resenseamentu eleitorál. Tanba, atu estabelese sentru votasaun iha rai li'ur tenke iha eleitór mínimu 50.

Eleitór ne'ebé hela namkari iha sidade Koreia, tékniku sira más halo ona koordenasaun ho embaixada buka meius oinsá bele atendementu ba eleitór ne'ebé namkari iha Koreia ho tempu falta semana ida sidadaun bele partisipa másimu prosesu resenseamentu.