Francisco Kalbuadi ne’ebé eleitu nu’udar Sekretáriu Jerál Partidu Congresso Nacional Reconstrução Timor-Leste (CNRT) hatama karta ne’e hodi hala'o servisu ho másimu iha kampaña lejizlativu iha fulan Jullu oin mai.

“Agora membru governu, turizmu arte kultura mak hatama ona karta suspensaun durante fulan rua nia laran. Signifika, nia para la hala’o ninia servisu inklui sei la simu ninia vensimentu”, dehan Primeiru Ministru, Rui Maria de Araújo, iha Palasiu Governu, horisehik.

Durante auzénsia ministru nian, Sekretaria Estadu Arte Kultura Maria Isabel de Jesus Ximenes mak sei asume responsabilidade nu’udar ministra interina.

Eis asesór ministra Finansas ne’e esplika, membru governu sira iha filiasaun polítika partidária. Ne’e duni, tuir lei membru governu sira mak tuir kampaña iha obrigasaun tenke husu suspensaun ba ninia funsaun atu bele partisipa kampaña.

Nia dehan, membru governu ida mak la hala'o ninia knaar ka funsaun iha ministériu ida la signifika ministériu ne’e para kompletamente.

“Ita hatene iha ministériu ne’e sei iha diretór jerál, diretór nasionál no xefe departamentu, inklui tékniku sira ne'e duni ministériu ne’e kontinua la’o”, dehan Xefe Governu.

Nia dehan, bainhira membru governu ida husu suspensaun sei afeta ba servisu ministériu ida nian tanba definisaun polítika foun mós sei laiha, tanba membru governu sira ninia responsabilidade mak sei define polítika ba instituisaun,

Maski nune’e, jestaun ruma ne'ebé trasa ona iha ministériu nia laran kontinua la'o tanba estrutura organograma funsiona nafatin.