Iha tinan 2020 bainhira partidu CNRT foti desizaun hodi sai husi koligasaun Aliansa Mudansa ba Progresu ne’ebé harii hamutuk ho Partidu Libertasaun Popular no Kmanek Haburas Unidade Nasionál Timor Oan (KHUNTO), Partidu FRETILIN mosu hodi tonka governu atu labele monu.
Ho prezensa FRETILIN iha governu la’os de’it hamosu mudansa iha kompozisaun ukun iha orgaun ezekutivu, maibé mosu mudansa boot iha orgaun lejislativu ne’ebé ikus mai meza Parlamentu Nasionál tenke rahun.
Ho desizaun ne’ebé FRETILIN foti hodi viabiliza governu halo governu ne’ebé xefia husi Taur Matan Ruak bele eziste to’o ohin loron.
Iha tinan 2022, bainhira partidu politiku no individu sira mosu hodi deklara ninia kandidatura ba Prezidente Repúblika, FRETILIN no Khunto mós mosu ho idaidak nia Prezidente Partidu.
Khunto deklara uluk ninia Prezidente Partidu, Armanda Berta dos Santos, nu’udar kandidatu Prezidente Repúblika, no FRETILIN mosu ikus hodi fó apoiu ba sira-nia Prezidente Partidu, Francisco Guterres Lú Olo, ne’ebé deklara uluk ona avansa nu’udar kandidatu independente.
Bainhira kampaña eleitoral ba kandidatu PR la’o, armonia entre lider sira iha leten la reflete iha kraik. Mosu konfrontu entre militante no apoiante Lú Olo no Berta.
Tuir video amadór ne’ebé espaila iha media sosial, apoainte husi kandidatu Prezidente Repúblika Armanda Berta dos Santos, halo agresaun fiziku hasoru sidadaun ida ne’ebé hatais faru kór mean ne’ebé deskonfia nu’udar kamiza kandidatu Prezidente Repúblika, Francisco Guterres Lú Olo.
Iha video ne’e, militante no apoiante Khunto ne’ebé sa’e kamioneta tuun hodi hobur sidadaun ida ne’ebé sa’e motor no hatais kamiza kandidatu Lú Olo. Maske nune’e la identifika data no fatin akontesimentu. Maibé husi video ne’e bele nota katak asaun ne’e mosu iha ambitu kampaña ba eleisaun prezidensial.
Molok ne’e, iha Domingu (06/03), mosu konfrontu entre militante partidu FRETILIN ho militante partidu Khunto.
Maizumenus iha tuku 2 loraik, bainhira militante partidu KHUNTO hala’o mini kampaña iha Baukau Villa, militante husi partidu FRETILIN hahú tuda.
Ho provokasaun husi militante partidu FRETILIN ne’e, militante sira husi partidu KHUNTO mós hahú halo reasaun no ikus mai tuda-malu entre militantes no apoiantes kandidatu Berta ho Lú Olo mós labele atu hasees.
Tuir video no imajen balun ne’ebé fahe iha media sosial hatudu, militantes partidu Khunto tuda rahun komunidade balun nia uma no loza iha area Tirilolo, Baukau Villa.
Vitima sira ne’ebé nia uma no loza rahun ezije ba kandidatu PR Armanda Berta atu hatudu ninia responsabilidade.
Iha akontesimentu ne’e, militante Khunto na’in tolu mak hetan kanek.
Hafoin kampaña remata, militante Khunto ne’ebé fila ba Laga hetan mós asaltu, maibé la konsege rezulta kanek.
Enkuantu, militante Khunto ne’ebé ba Venilale hetan tuda husi grupu dezkoñesidu ne’ebé rezulta na’in lima kanek.
Ba konfrontu ne’e, Komandante PNTL Munisipiu Baukau, Superintendente Polisia António Maria de Sá hatete, insidente tuda-malu entre apoiante no simpatizante husi kandidatu Prezidente númeru 6 no 9 iha Munisipiu Baukau rezulta ema na’in 14 kanek.
Aleinde na’in 14 kanek, polisia mós rejista estragus balun hanesan uma ida rahun no motor rua hetan estragus.
Hafoin kazu ne’e akontese, nia dehan, polisia konsege kaptura suspeitu na’in 7 ho inisial MDS (20), RPG (20), BDS (19), NBF (47), no JCB (23), husi Caudade, Uma-Ana Ulu, Venilále. AF (20) husi Caudade, Uma-Ana Ikun, no JAS husi Lacu-Uma, Mahamori Venilale (45).
“Iha insidente ita rejista vitima na’in 14 no kaptura suspeitu na’in 7, ita aprezenta ba iha Ministeriu Publiku foti desizaun, aplika termu identidade rezidensia ba sira,” dehan António ba via telefone, Kuarta (09/03).
Komandante ne’e dehan, nia parte prontu atu asegura kampaña kandidatu Prezidente Repúblika Francisco Guterrres Lú Olo ne’ebé tuir kalendariu sei realiza kampaña iha Baukau iha 12 Marsu ne’e.
“Ami iha rekursu atu halo seguransa ba kampaña, maibé kandidatu ho ekipa susesu sira tenke koopera di’ak ho ami, bainhira situasaun krime saida de’it mak akontese ami sei la tolera,” dehan nia.
FM Konsidera Polisia Tarde
Diretór Interinu Fundasaun Mahein (FM), Sancho Xavier hatete, iha kampaña eleitoral ne'ebé daudaun ne'e la'o, iha fatin balun mosu konfrontu entre apoiante no simpatizante husi kandidatu PR sira tanba polisia mak tarde halo atuasaun.
“Loloos ne'e iha komboiu sira hanesan ne'e polisia akompaña tanba ho massa barak, maibé durante ne'e ita haree PNTL tarde atu halo atuasaun, entaun ida ne'e mós provoka problema mosu iha tempu kampaña,” dehan Sancho ba jornalista sira iha nia knaar fatin, Bairu Grilhos, Dili, Kinta (10/03).
Ezemplu, nia dehan, kazu ne’ebé akontese iha munisipiu Baukau no Vikeke, hafoin problema akontese mak PNTL foin halo atuasaun.
“Ha'u hanoin importante liu iha situasaun sira hanesan ne'e PNTL haree ona lisaun sira ne'ebé akontese ona ne'e, tanba ita espera iha komisu ne'ebé sei halo mai ne'e posibilidade sei iha problema,” dehan nia.
Aleinde ne’e, tuir observasaun FM, durante kampaña apoiante kandidatu PR balun komete iregularidade.
“Ita haree iha kampaña balun, sira utiliza simbolu artemarsiais. Iha kandidatu balun ne'ebé aprezenta artemarsiais, tuir loloos iha lei númeru 5/2017 ne'e bandu partidu polítiku sira labele utiliza artemarsiais ne'e ba sira-nia interese no iha artemarsiais balun mós uza atributu ba kampaña,” dehan nia.
Iha mós apoiante balun ne’ebé kontra kodigu estrada nian, liu-liu bainhira hala’o komboiu ho motor la uza kapasete.
“Depois balun tuur iha karreta nia kapon leten, tanba massa barak liu PNTL rasik la konsege kontrola ida ne'e. Ha’u hanoin ida ne'e iregularidade ida ne'ebé ita rejistu iha tempu kampaña ne'e,” nia hatete.
