Kandidatu PR, Mariano Assanami Sabino Lopes hateten, Timor-Leste rai estratejiku iha Azean Pasifiku, governu presiza promove aan hodi dezenvolve setór importante sira ne’ebé bele dudu ekonomia rai laran.
Timor ukun aan tinan 20 ona, maibé presiza dezenvolve setór agrikultura, governu presiza fasilita atu asesu kreditu hodi sira bele haluan sira nia servisu.
“Se karik ha’u sai prezidente Repúblika sei ko’alia ho governu tau osan iha Banku Nasionál Timor-Leste fasilita kreditu ba agrikultór sira karik sira hakarak kuda kafe ka vanilla sira bele iha osan para uza ba servisu,” dehan nia, iha Kampu futebol Ermera Gleno, Sabadu (12/03).
Assanami informa, governu presiza fasilita kreditu ba sira tanba durante ne’e sira ho sira deve malu ho osan funan ne’ebé boot, entaun governu presiza fasilita sira kreditu ho osan fununan ne’ebé ki’ik atu bele hamoris sira nia atividade.
Governu tenke hatene uza osan no buka osan hodi investe iha setór importante sira ne’ebé bele hamoris povu no nasaun tuir mehi funu nain sira nian.
Atu garantia povu nia moris diak maka joven foinsa’e sira, agrikultór sira presiza iha fileira ida de’it hodi apoiu ba kandidatura ho númeru sorteiu 16, sai Prezidente Repúblika hodi trasa politika jeral ida nune’e orienta governu hodi hadia povu nia moris.
