Kandidatu PR Mariano Assanami Sabino Lopes hateten, aman sira otas tuan mai dadaun ona, maibé sira labele lakon esperansa tanba jerasaun ne’ebé hambrik uluk la’o hamutuk ho sira  ohin to’o nia otas atu hatutan fila fali obra ne’ebé mak iha sira nia kabas.

“Bainhira ha’u sai Prezidente Repúblika ha’u sei tau Maun Boot Xanana, Taur Matan Ruak, Ramos Horta, Alkatiri, Lere no sira seluk tan sai konseleiru ba nasaun atu haree ba prosesu dezenvolvimentu saida mak jerasaun foun sira atu halo,” dehan nia, iha Kampu Demokrasia Lopalos, Domingo (11/03).

Assanami informa, razaun fundamental sai PR hakarak atu hakotu ona konflitu ne’ebé sira iha, la merese ona sira hambrik iha palku hodi trata no insulta malu, tempu ona sira deskansa fó konsellu ba jerasaun foun ne’ebé atu kaer ukun hodi nafatin dignifika pasadu no fó esperansa ba jerasaun foun sira.

Tempu to’o ona hapara konta istoria hodi ataka malu, akuza malu ne’e la importante, tanba jerasaun foun sira dadaun ne’e presiza kampu servisu, presiza edukasaun no saúde ne’ebé kualidade.

Joven sira iha era independensia ne’e presiza goza sira nia vida, labele mosu tan joven ida mate iha luron tanba ema sona, joven ida labele hetan torturasaun no tama kadeia tanba de’it  situasaun ne’ebé la estavel.

“Uluk ami eskola kesi kabun, hetan torturasaun husi militar, tama sai kadeia tanba luta ba independensia, ohin lakohi imi hamlaha, hetan torturasaun, ohin ha’u hambrik nudar mate restu foti responsabilidade lakohi imi hanesan ho ami,” dehan nia.

Ohin la tempu ona atu joven sira asiste bebeik konflitu tradisionál, ne’ebé implika ba hamosu impase politika, halo ekonomia hakdasak.

“Ha’u husu deskulpa ba aman sira atu hapara ona insulta malu iha palku leten, tanba futuru joven ne’e importante,” dehan nia.

Tempu to’o ona hanoin oinsá atu loke kampu servisu ba joven sira, hakbiit joven sira nia kapasidade atu bele kompete ho joven sira husi nasaun seluk.

Tanba ne’e, husu povu tomak atu vota ba kandiatura ho númeru sorteiu 16 atu eleitu ba Xefe Estadu hodi hakotu ona koflitu aman sira nian no lori dezenvolvimentu ba povu tomak.