Anacleto hatete, bainhira povu fó fiar ba nia sai Prezidente Republika, nia sei dada investór husi rai li’ur, hodi halo investimentu iha Timor-Leste atu bele halo mudansa ba ekomonia rai laran.
“Ita konvida investimentu husi rai li’ur ne’ebé bele mai hamosu industria ka fabrika barak-barak iha ita-nia rain, ita hanoin hela hanesan iha kampaña iha fatin lubuk-oan ida, ha’u dehan tiha ona nú mininu iha munisipiu ida iha fabrika ka industria ida. Nune’e ita bele hamosu postu de traballo laos konsentraliza de’it iha Dili, obriga populasaun ne’e aglumera iha Dili, maibé ita tau munisipiu atu dada populasaun ne’ebé mai husi Bobonaro fila fali mai Bobonaro, no ida ne’ebé iha Lospalos fila fali ba Lospalos,”dehan nia liu husi diskursu, iha mini kampaña aberta, iha Suku Male-Ubu, Postu Administrativu Hauba, Munispiu Bobonaro, sabado horseik (12/03).
Nune’e mós, bainhira povu fó fiar, nia promote sei redus taxa dezempregu ne’ebé sa’e makaas iha TL.
Iha fatin hanesan, Prezidente Partidu Demokratiku Republika Timor, Agostigo Gomes, promote, PDRT iha ona ema matenek ida atu ukun husi Xefe Estadu to’o Governu.
Tanba ne’e nia dehan, bainhira povu fó fiar ba Kandidatu ho numeru sorteiu 5, sei fó prioridade mós ba infraesturuta liu-liu ba estrada no bee moos iha teritoriu laran tomak.
“Tinan 20 ita gasta osan 16 milloes, ha’u mak hanesan 16 milloes ne’e, povu ne’e ho kareta ho iha uma ida iha uma oin ona, ita haree estrada kuak ba mai, demais. Ita haree husi munisipiu ermera too mai iha ne’e (Male-Ubu) no Maliana vila hanesan mota boot ida sa’e tiha ida ne’eba, ukun na’in sira nia fuan ba ne’ebé,” nia dehan.
Tuir nia, laos populasaun husi Bobonaro ho Maliana de’it mak infrenta situasaun ne’e, maibé iha fatin balun mós infrenta situasaun hanesan, liu-liu bee moos, estrada no eletrisidade.
Entretantu, Koordenadór Partidu Munisipiu Bobonaro, Domingos Barros, husu ba militante no simpatizantes sira atu fó sira nia votus ba Kandidatu ho numeru sorteiu 5, atu nune’e bele halo mudansa ba rai ida ne’e no lori povu ba moris diak.
Enkuntu, tuir ofisial observasaun CNE, Suku Male-Ubu, Sergio Francisco, hatete, iha Suku Male-Ubu foin ba daluhuk, Kandidatu numeru sorteiu 5 mak halo ninia kampaña komprimisiu iha fatin ida ne’e.
“Tuir observasaun ami nia ohin (12/03), nota de’it hetan evolvimetu husi labarik kiik-oan sira ne’ebé la hetan autorizasaun tuir lei haruka,”nia dehan.
Nune’e, ba asuntu, CNE alista ona no sei lori ba Diretór munispiu nian, hafoin sei foti medidas kona ba envolvimentu labarik sira iha kampaña refere.
Aleinde, nia dehan, antes hahú orariu kampaña seidauk iha sosializaun husi parte relevante sira, liu-liu husi Institutu Defeze ba Direitu Labarik.
Tuir observasaun husi Jornalista INDEPENDENTE asesu iha terenu nota Katak, militante no simpatizantes husi Partidu Demokratiku Republika Timor (PDRT) ne’ebé partisipa iha mini kampaña komprimisiu ne’e, maizomenus rihun 8.
