Anacleto dehan, nia sei uza nia poder nu’udar Xefe Estadu hodi influensia governu atu halo selesaun no nomeiasaun ba diplomata no embaixadór Timor-Leste bazeia kriteria profisionalizmu.
“Hanesan Prezidente Republika bainhira povu fó fiar ha'u sei halo fali revizaun ida total ba ita-nia servisu reprezentasaun diplomatika nian ka kolokosaun diplomatika emabaixadór iha rai li’ur.”
“Ha'u sei halo, uza poder de influensia hodi dehan ba Governu atu halo selesaun ka nomeiasaun ba diplomatika labele bazeia ba pozisaun politiku iha partidu, maibé tenke bazeia ba kriteria profisionalizmu,” dehan nia iha konferensia imprensa, iha sede PDRT, Sesta (11/03).
Bainhira halo selesaun por meritu, nia hatutan, bele halo reprezentasaun ida loloos no tau ema loloos iha fatin loloos hodi reprezenta nasaun TL iha rai li’ur.
Tanba, nia dehan, reprezentasaun iha rai li’ur, ba laos reprezenta nia partidu ne’ebé hetan ukun, maibé reprezenta nasaun tomak, nune’e koloka ema ne’ebé iha duni profisionalizmu.
Nia akresenta, hanesan Prezidente Republika sei halo esforsu makaas hodi dehan ba Governu liu-husi Ministeriu Negosiu Estranjeirus no kooperasaun katak, koloka ema ne’ebé atu sai diplomata ka sai embaixadór, tenke ema ne’ebé domina nia area servisu no laos ema ne’ebé mak iha fatin ka estrututa partidu nian.
Entretantu, Kandidatu ho numeru sorteiu 5 haktuir, bainhira eleitu nu’udar Prezidente Republika sei halo esforsu fó apoiu governu hodi hala’o implementa programa dezenvolvimentu nian ho loloos tuir buat ne’ebé sira hatur ona iha planu, atu bele salva guarda mós ba planu programa hirak ne’e hotu atu bele implementa loloos ba dezenvolvimentu iha nasaun.
Aleinde ne’e, nia dehan, sei uza esforsu tomak hodi halo despolitizasaun ba makina estadu ka funsionalizmu publiku. Ida ne’e sei halo, liu maneira barak, sei halo regulamentu rejimentu ida intermu ida rigoroju no sei halo separasaun ida entre poder administrative no poder politiku.
Nune’e, bele apoiu nafatin rejime kareira funsionalimu publiku nian atu bele hadia funsionariu publiku sira nia moris no eleva sira nia kapasidade sosial atu sira mós hetan moris ne’ebé mak digno.
Enkuantu, tama ba loron dala-10 kampaña eleitoral door to door Kandidatu numeru sorteiu 5, halo de’it konferensia imprensa hodi husu ba militante no apoiantes iha Munisipiu Vikeke nafatin tama uma sai uma konvense eleitores hodi tau fiar ba nia sai Xefe Estadu ba nasaun Timor-Leste.
Kandidatu Prezidente Republika numeru 5 ne’e, klarifika, la marka prezensa iha kampaña door to door iha Munisipiu Vikekek, tanba kestaun tekniku.
Tanba ne’e nia dehan, husu estrutura sira tomak atu servisu makaas lori partidu nia naran atu hetan votus ba partidu nia programa no kandidatu nia programa.
