Presidente CNE, Komisariu Alcino Barris preokupa tebes ema balun ne’ebé aproveita halo dezakredita ou halo ajitasaun masa ba desizaun orgaun estadu sira halo ona.

Barris afirma, kuandu iha palku politika mak reprove fali orgaun soberanu ida iha pérante públiku ne’e la etika ona.

Komisariu CNE ne’e la temi ema ne’ebé deskonfia halo ajitasaun, maibé nia konsidera katak, hahalok ne’e hanesan ajitasaun no provokasaun inklui destabeliza unidade nasionál.

CNE rasik mak sei aprejenta prosesu ne’e ba Polisia Servisu Investigasaun Kriminal (SIK) atu haree.

“Ha’u la haree hanesan partidu politiku maibé nu’udar individu ne’ebé iha ona interese halo ajitasaun. Maske ita nia konstituisaun preve kona ba liberdade espresa maibé iha lei mós koalia kona ba salva guarda ba linguazen ne’ebé bele afeta fali buat ne’e atu perturba instablidade pais nian,”tenik nia

Tuir Barris katak, ajitasaun ne’ebé individu husi partidu balun halo ne’e atu halakon konfiansa povu nian ba orgaun estadu. Nia dehan, akontesementu ne’e iha kampaña dahuluk ParPol balun nian iha Ainaro.