Antes ne’e Governu aprova ona orsamentu ba eleisaun antesipada hamutuk tokon $4.7 dollar Amerika. Tanba ne’e total orsamentu ba eleisaun antesipada sa’e ba tokon $4.850 dollar Amerika (tokon haat, rihun atus walu lima nulu dollar Amerika).

“Orsamentu mak tokon $4.7 maibé aumentan oituan ne’e mak rihun $150 tanba sei aumenta tan sentru votasaun nomos urnas,”dehan Ministru Administrasaun Estatal, Valentim Ximenes iha salaun INAP Komoro horsehik.

Ministru ne’e esplika, bainhira loke tan sentru votasaun ne’e mak sei rekruta tan brigadista sira hala’o formasaun no aumenta transporte.

Aleinde ne’e, Prezidente Konsellu ADTL, Joaquim Freitas Soares hatete, kada eleisaun sira sempre iha observador sira sempre konvida mós STAE ho CNE hodi fahe informasaun no halo edukasaun sivika, atu nune’e enkoraja nafatin ba sira ne’ebé laiha kartaun eleitoral bele ba asesu.

“Ami mós koalia hela CNE ho STAE atu kria kondisaun ba fatin votasaun nune’e ema ho difisiensia iha direitu ba vota,”tenik nia.