Bulletin Votus 78 Iha Aileu Nakles Uluk Ona

By Domingos Gomes Marsu 18, 2022 363
Ekipa tekniku Munisipiu Aileu, kompostu husi STAE, CNE, Fiskais no akompanha husi parte seguransa PNTL,sesta ohin (18/3) halo ona distribusaun material sensitivu no la’os sensitivu ba iha sentru votasaun ho estasaun votus sira hamutuk 153 iha Munisipiu Aileu. Foto kontribuidor. Ekipa tekniku Munisipiu Aileu, kompostu husi STAE, CNE, Fiskais no akompanha husi parte seguransa PNTL,sesta ohin (18/3) halo ona distribusaun material sensitivu no la’os sensitivu ba iha sentru votasaun ho estasaun votus sira hamutuk 153 iha Munisipiu Aileu. Foto kontribuidor.

AILEU: Sekretariu Tekniku Administrasaun Eleitoral (STAE) Munisipiu Aileu identifika bulletin votus hamutuk 78 nakles uluk ona.

Diretór STAE Munisipiu Aileu, Romana de Jesus Alves hateten, ekipa tekniku eleitoral halo verifikasaun identifika bulletin votus hamutuk 78 mak nakles uluk ona, tanba ne’e ekipa deside tau karimbu kanseladu, la uza ona iha loron votasaun 19 Marsu.

"Sim ita identifika duni iha bulletin votus balun noda, númeru serial dupla no balun nakles uluk ona ne'e mak hamutuk 78, tanba ne’e ami deside tau karimbu kanseladu ita sei lá uza ona atu halo eleisaun," dehan Romana ba Jornal INDEPENDENTE via telefone, Sexta ohin (18/03).

Nia dehan, material bulletin votus sira ne'ebé nakles uluk ona, problema iha prosesu emprime nasional mak tekniku sira lá haree.

Iha prosesu verifikasaun ba matérial bulletin votus kompostu husi ekipa tekniku eleitoral husi STAE, CNE, Brigada no fiskais husi kandidatu PR na’in 16 no hetan seguransa maximu husi PNTL Munisipiu Aleiu.

Alende ne'e nia dehan, ekipa hahú ona halo distribusaun material sensitivu no la’os sensitivu ba iha sentru votasaun sira iha Munisipiu Aileu hamutuk 73 no estasaun votus hamutuk 80.

"Ohin ami halo ona distribusaun material sensitivu no la’os sensitivu ba iha sentru votasaun ho estasaun votus sira hamutuk 153 iha Munisipiu Aileu atu bele halo prepasaun ba eleisaun presidensial," dehan nia.

Tanba ne'e iha Munisipiu Aileu iha suku 33 no postu Administrativu hamutuk haat.

Nia afirma, material bulletin votus ne'ebé ekipa STAE Munisipiu Aileu simu husi nasional iha livru hamutuk rihun 7.055 ho foilla hamutuk rihun 37.750, maibé iha 78 mak nakles uluk ona hela rihun 75.672 mak sei uza ba halo votasaun.

Tuir dadus sidadaun iha Munisipiu Aileu ne'ebé halo ona resensamentu eleitoral hamutuk rihun 33.603 kompostu husi mane 17. 993 no feto 15.610 mak sei tuir eleisaun presidensial, 19 Marsu tinan 2022.

Entretantu iha distribusaun material ba sentru votasaun ho estasaun votus iha Munisipiu Aileu hetan seguransa maximu husi komandu PNTL Munisipiu Aileu.

Rate this item
(0 votes)

Independente Digital TV