Ministériu Públiku reprezenta husi Prokuradora Lídia Soares, konsidera maioria faktu aprovadu. Arguidu halo pedidu atu halo pagamentu ba konstrusaun Ospitál Referál Baukau maski projetu seidauk la’o ikus mai paradu.
Tanba ne’e, tuir Ministériu Públiku, arguidu nia hahalok komete krime partisipasaun ekonomia, ne’ebé previstu iha artigu 299 Kódigu Penál.
Entretantu, parte defeza arguidu Defensór Públiku, Câncio Xavier, husu ba Tribunál atu absolve kazu ne’e tanba tuir defeza arguidu la halo pagamentu ba kompañia, maibé ba traballadór sira ne’ebé kompana abandona hela sira.
Desizaun ne’e mós la'ós arguidu mesak mak halo, maibé sira ekipa mak halo desizaun. Iha momentu ne’ebá arguidu asina prosesu pagamentu nu’udar Diretór Nasionál Aprovizionamentu Ministériu Finansas.
Antes ne’e, tuir akuzasaun husi Ministériu públiku ne’ebé Tribunál lee sai, iha fulan Janeiru to’o Dezembru 2007-2008, Ministériu Saúde loke tenderizasaun ba konstrusaun Ospitál Referál Baukau.
Orsamentu ba projetu konstrusaun ba ospitál ne’e ho montante tokon haat Dolar Amerikanu, ne'ebé manan husi kompañia More Green Construction husi Koreia Súl ho nia naran Un-Taek Yi.
Obra ne’e nia fiskál atinje 4% kompañia hahú abandona, maibé altura ne'ebá iha tinan 2008 arguidu hanesan Diretór Nasionál Aprovizionamentu MF, maibé arguidu halo pedidu pagamentu bazeia ba orientasaun husi asesór legál MF, hodi prosesa pagamentu ba konta bankária privadu ho naran Leonito Freitas Belo ho Américo Dias, la'ós ba konta bankária kompañia Margin Construction.
Totál osan ne’ebé arguidu mensiona iha pedidu pagamentu haruka ba MF hamutuk $107.028,34.
Nune’e, Governu mós halo pagamentu dala rua ba obra ne’e. Tanba ne’e, Ministériu Públiku akuza arguidu ho krime partisipasaun ekonomia ne’ebé previstu iha artigu 299 Kódigu Penál.
Hafoin rona tiha deklarasaun husi Ministériu Públiku (MP) ho Defensór Públiku (DP), Tribunál adia fali julgamentu ne’e ba iha loron 15 Setembru 2017 hodi rona desizaun finál.
Audiénsia julgamentu ne’e prezide husi juis koletivu, Eusébio Xavier, Jacinta Correia no Ana Paula, Ministériu Públiku reprezenta husi Prokuradora Lídia Soares, arguidu hetan asisténsia legál husi Defensór Públiku Câncio Xavier.
