Programa H6, nia dehan ne’e polítika no planu nasionál haburas timor liu tan iha setór hotu-hotu.
Tanba, Alkatiri dehan, durante tinan 10 ona FRETILIN la kaer ukun ne’ebé hatudu rezultadu la tuir povu nia hakarak.
“Ita nia edukasaun la’o laloos, polítika kurríkulu muda tun sa'e la permanente, ita nia profesór sira la tama servisu mai asina mas la halo servisu”, dehan nia liu husi komísiu kampaña polítika ba dala ikus iha Tasi Tolu-Dili, Kuarta (19/07).
Kaer ukun, nia dehan, FRETILIN sei hadi’a uluk polítika no sistema iha área edukasaun, saúde , Agrikultura, infra-estrutura no turizmu inklui setór sira seluk hodi dezenvolve rai doben ne’e ba buras liu tan.
“Ita bele dehan ministru sira laiha polítika atu halo dezenvolvimentu, maibé sira hakarak pasiar de’it iha rai liu uza osan estadu”, dehan nia. Polítika FRETILIN hakarak harii no hametin pás no estabilidade, hametin unidade nasionál, haburas povu nia vida tomak, haburas ekonomia, hadi’a setór hotu-hotu.
“Ita labele depende de’it ba osan mina rai, maibé oinsá atu haburas osan sira ne’e ba di’ak liu no ekonomia sustentavel hodi labele depende ba osan mina rai”.
Nia observa, setór infraestrutura moris ho emerjénsia de’it, la’ós ho polítika ida di’ak atu bele halo dezenvolvimentu ho kualidade di’ak. FRETILIN fila ba ukun sei haburas no habelar dezenvolvimentu iha Oekusi ba munisípiu tomak.
FRETILIN sei muda no hadi’a sistema barak hanesan hamosu lei kontra korrupsaun, bee moos, infraestrutura, agrikultura, ekonomia, turizmu
“Bubar tia komisaun omenajen depois harii komisaun foun, investiga sira hotu husi leten mai to’o kraik, loke fila fali inskrisaun ba veteranu hotu-hotu, halo avaliasaun foun ba veteranu sira se maka iha direitu simu se maka laiha direitu simu”.
FRETILIN la halo persegisaun ba Ferik no katuas sira, maibé sira sei kontinua simu subsídiu.
“Joven atu la’o ba oin Governu tenke buka dalan atu deskobre talentu joven sira nian, iha múzika, desportu, arte,maibé governu tenke iha polítika atu investe ba setór privadu sira atu loke kampu servisu ba joven sira”, tenik nia.
Iha fatin hanesan, Vise Sekretáriu Jerál Partidu FRETILIN, José Reis, hatete vota ba FRETILIN atu lori dezenvolvimentu haburas liu tan rai no povu ida ne’e.
“S1, s2 ne’e ha’u maka estrese fó konfiansa sira kongfu fali, tan ne’e ita tenke hasai Xanana husi tahu laran,atu hasai Xanana husi tahu laran, maka FRETILIN tenke manan,Xanana manan”, nia afirma.
