Governu fó apoiu tomak ba servisu tomak ne’ebé ekipa negosiasaun fronteira tasi Timor halo hela. Maski nune’e, xefe ekipa ne’e hetan legalidade liu husi tomada de pose.
“Bainhira asina akordu fronteira marítima maka Xanana tenke simu pose lai”, dehan PM Alkatiri, hafoin suru-mutu ho Prezidente Repúblika, iha Palásiu Prezidensiál, Bairru-Pité, horisehik.
Nia hatutan, akordu entendimentu fronteira ne’e to’o iha fulan Marsu nian Timor-Leste ho Austrália bele asina ona, maibé kona-ba akordu esplorasaun mina greater sunrise nian sei diskute hela.
Nia reforsa katak, bainhira Xanana Gusmão asina ona akordu maka tenke mai Timor hodi simu toma de pose. Nune’e bele diskute ninia estatutu, tan ne’e maka governu halo ona proposta ba alta autoridade.
“Ha’u rona de’it katak (Xanana) sai ona Prezidente Alta Autoridade ba Fronteira Marítima nian, maibé ha’u hakarak rona direita husi Xanana. Se halo tiha lei maka nia mai dehan lakohi fali halo nusa”, hateten Mari.
Nia akresenta, kuandu Xanana la konsege simu Pose husi Prezidente Repúblika maka halo adiamentu fali, tanba xefe Governu mós labele asina.
Antes ne’e, Embaixadór Austrália, Peter Doyle konfirmandu katak Austrália Timor-Leste sei asina nota entendimentu foun kona-ba tasi Timor iha fulan Marsu. Nune’e, Austrália no Timor-Leste liu husi komisaun konsolidasaun hasoru malu iha Sidney hodi diskusaun asuntu ne’e.
Informasaun ne’ebé diáriu ne’e rekolla husi website ofisial Gabinete Fronteira Marítima Timor-Leste katak, Konsellu ba Delimitasaun Definitiva ba Fronteira Marítima monu iha Primeiru-Ministru nia okos no mós responsavel atu halo negosiasaun kona-ba delimitasaun permanente ba fronteira marítima ho Indonézia no Austrália.
Nune’e, Tuir Governu nia Rezolusaun No. 9 / 2016 loron 3 Fevereiru 2016, Konsellu Ministru hili Kay Rala Xanana Gusmão, hanesan Xefe Negosiadór no mós hanesan membru ida ba Konsellu.
Konsellu ba Delimitasaun Definitiva ba Fronteira Marítima kompostu ho Primeiru-Ministru no Xefe Negosiadór. Primeiru-Ministru mós bele konvida lider ka ulun na'in boot nasaun nian, husi pasadu no presente.
Ekipa negosiasaun, Xefe Negosiadór mak lidera, nia mak responsabiliza hodi hala'o negosiasaun sira ne’ebé relasiona ho fronteira marítima.
Gabinete Fronteira Marítima mak Sekretariadu ba Konsellu ba Delimitasaun Definitiva ba Fronteira Marítima.
Tuir Rezolusaun Governu No. 9 / 2016 loron 3 Fevereiru 2016, dezignada Negosiadór Prinsipál husi Ekipa Negosiasaun Tratadu nian ida ba Delimitasaun Definitiva Fronteira Marítima nian sira.
Konsellu-Ministru hili Kay Rala Xanana Gusmão hanesan Negosiadór Prinsipál husi Ekipa Negosiasaun Tratadu nian ida ba Delimitasaun Definitiva husi Fronteira Marítima nian ho Commonwealth Austrália no Repúblika Indonézia.
Konsellu Ministru mós define katak, Negosiadór Prinsipál hanesan responsavel husi definisaun estratéjia negosiasaun Konsellu nian ba Delimitasaun Definitiva Fronteira Marítima nian sira.
