Promesa modernizasaun ne’e ho objetivu atu bele dignifika, haforsa no hasa’e kapasidade membru F-FDTL hodi nune'e bele susesu iha kualkér atuasaun.

“Ha’u sei haree hamutuk nafatin ho órgaun soberania sira seluk, óinsa hadi'a no moderniza F-FDTL atu ita bele hetan ita nia objetivu katak,  atu dignifika, haforsa no hasa’e kapasidade F-FDTL,” tenik nia.   

Lú-Olo mós apela ba membru Forsa Armada hotu, atu servisu liu tan no reforsa beibeik prinsípiu kultura militár nian, tanba militár maka  riin ne’ebé tane instituisaun militár ida ne’ebé forte no importante ba identidade no unidade nasionál.

“Ha’u apela ba imi hotu atu servisu liu tan no reforsa ba bei-beik, prinsípiu kulturál militár nian, nu’udar riin sira ne’ebé tane instituisaun militár ida ne’ebé forte no importante ba ita nia identidade no unidade nasionál,” dehan Lu Olo iha nia diskursu durante serimónia aniversáriu F-FDTL ba dala sanulu resin hitu iha Kuartél Jenerál, Fatu hada, Dili Sesta (02/02).

Nu’udar komandante supremu Lu Olo sente orgullu boot ba Forsa Defeza Timór Leste ne’ebé eziste  to’o ohin loron.

“Ha’u nu’udar Komandante Supremu sente orgullu boot ba Forsa Defeza Timór Leste, ne’ebé ita iha to’o ohin loron. Tanba sira maka sai ita nia lutu ba nasaun ida ne’e,” hateten PR Lu Olo.