Maibé, labele mete partidu polítika atu nune'e bele sai lutu ba nasaun iha defeza esterna ho neutru no profisionál.

Xefe Estadu Maiór Jenerál FALINTIL  Forsa Defeza Timor Leste (F-FDTL) hato’o asuntu ne’e iha serimónia aniversáriu transformasaun FALINTIL ba FDTL  ba dala 17 iha kuartél jenerál Fatu hada, Sesta (02/02).

Nia dehan, Forsa armada tenke hatene duni saida mak polítika, atu nune’e bele halo analiza ba buat ne'ebé loos no la loos.

Hodi nune’e, Instituisaun forsa armada ne’e labele hetan intervensaun ka manobra husi ema seluk.

Nia fó ezemplu katak, iha nasaun lubuk ida mak polítiku na’in sira aproveita forsa armada hodi alkansa sira nia objetivu.

Ezemplu konkretu mak hanesan nasaun Giné Bis sau no Myanmar. Maibé iha Timor Leste labele akontese, tanba ne’e duni  mak forsa armada tenke hatene polítika atu  bele halo análize.

“ha’u rona kritika no komentáriu barak, refere ba papél forsa armada nian. Ema barak mak hateten katak, forsa labele mete iha polítika. Loos duni ofisial militár sira iha de’it responsabilidade iha forsa armada nia laran, maibé tenke aprende no hatene polítika”, tenik nia.