Husi uma hirak ne’e, uma hitu (7) ai-han hanehan iha iha Suku Bebonuk, Postu Administrativu Don Aleixo, Munisípiu Dili.
Akontese mós iha suku Bairru-Pité, ne’ebé komunidade ida nia-uma hetan estraga husi anin. Iha Suku Komoro hamutuk uma haat no uma ida iha Postu Administrativu Hera.
Xefe Departamentu Jestaun Emerjénsia (DJE), Albino Nicolau Freitas hatete, hafoin akontesimentu ne’e, iha dadeer, sira simu direita informasaun husi xefe suku katak ai-tohar hodi hanehan uma.
Nia hatutan, hafoin akontesimentu ne’e, dadeer ne’e kedas ekipa husi Direcção Nacionál Gestão Dezastre (DNGD) hamutuk ho Sentru MSS Munisípiu konvoka kedas reuniaun ida ho parseiru CVTL hodi tun ba fó apoiu emerjénsia.
“Ekipa sira ne’e tun daudaun ona ba iha terrenu para hodi observa no fó kedas apoiu ruma emerjénsia”, dehan Albino, iha nia servisu fatin, horisehik.
Nia dehan, apoiu DNGD maka apoiu emerjénsia hanesan sasán báziku sira, foos, mina no seluk tan.
Kona-ba uma sira ne’ebé hetan estragu, DNGD sei halo verifikasaun. Iha kritériu hira kedas maka tenke prienxe katak, sé maka bele hetan apoiu rekuperasaun ruma ka bele hetan de'it maka apoiu emerjénsia.
“Ekipa konjuntu boot ne’ebé ita bolu dehan DGMC maka halo levantamentu dadus”, hateten nia.
Albino hatutan, ekipa sira ne’ebé tun, kompostu husi CVTL, parseiru nasionál no internasionál sira hamutuk ho PNTL no autoridade lokál sira tun daudaun ona ba iha baze hodi bele halo identifikasaun hafoin maka sei haree apoiu saída maka DNGD atu fó.
Nia informa, oras ne’e daudaun DNGD mós simu ona informasaun balu husi munisípiu sira katak anin sobu mós uma komunidade sira balu nia uma.
Nia afirma, akontesimentu sira hanesan ne’e la’ós sira hein de'it informasaun, maibé sira mós kontaktu diretamente ba iha munisípiu sira hodi buka hatene saída maka akontese iha territóriu nasionál.
Maibé, ho akontesimentu horisehik, sira seidauk hetan dadus ida fiksu husi munisípiu, tanba sira sei servisu hela hodi halo identifikasaun. Bainhira sira halo levantamentu dadus maka hotu ona, maka parte munisípiu sei informa fali ba DNGD hodi bele fó apoiu emerjénsia.
