Ne’e duni, Sekretáriu Jerál FRETILIN, Mari Alkatiri dehan, tinan 10 nia laran programa barak mak Governu anteriór sira halo PDIP, PEDN, maibé programa sira ne’e patina iha fatin de’it.

Nia dehan, osan ne’ebé sira gasta ne’e husi fundu petrolíferu, maibé osan hirak ne’e nia-paradeiru to’o ne’ebé ohin loron povu Timor Leste kontinua moris ki’ak.

“Ita sura osan sira ne’e biliaun $1 ba munisípiu ida (karik) oras ne’e ita nia povu iha munisípiu ne’ebá moris di'ak ona”, tenik, Alkatiri, iha Aileu, sesta (2/2).

Ne’e duni, iha FRETILIN nia ukun, hakarak ezije osan sira ne’ebé gasta nia rezultadu oinsá ona no paradeiru osan ne’e to’o iha ne’ebé, povu to’o ohin loron kontinua moris mukit.

Alkatiri fó ezemplu katak iha Oekusi, gasta de'it tokon $200 sai sidade ona, sai ezemplu boot nasaun ne’e.

“Ami la subar. Ami hakarak justisa sosiál, justisa ekonomia no ami nakloke,” deklara Alkatiri.

Tan ne’e, iha FRETILIN ho PD nia ukun atu investiga loloos osan ne’ebé foti husi fundu mina-rai iha tinan 10 nia laran ho montante biliaun $14 rezultadu oinsá ona.

Koordena ho Tribunál Kontas Halo Auditoria

Nune’e, Xefe Governu mós iha semana oin hakarak koordena ho empreza balun no mós Tribunál kontas atu halo auditoria ba projetu boboot sira iha Timor laran tomak hahú husi Oekusi to’o Lautem.

“Ha'u hakarak auditoria uluk mak Oekusi no ha'u laiha rexeiu”, dehan Alkatiri.

Nia dehan, bainhira sira halai hamutuk VII Governu koordena ho povu atu halo auditoria ba projetu sira iha Timor laran tomak, tenke iha Justisa sosiál no ekonomia ba projetu tantu boot ho ki’ik iha territóriu tomak.

Ne’e duni, governu ne’e hakarak iha semana ne’e koordena ho empreza ho Tribunál Kontas atu halo auditoria ba projetu boboot sira iha Timor laran tomak.