×

Atenção

Falha ao deletar 118-twitter.json

Xanana Observa Direita Uma Komunidade Ne’ebé Mota Sobu iha Aldeia Nunuhenu Featured

By Janeiru 13, 2023 214
Komunidade sira simu vizita Lider Istoriku, Kay Rala Xanana Gusmão ne’ebé tun direita obserba uma komunidade no simuteriu jerál ne’ebé mota sobu iha Aldeia Nunuhenu, Suku Cuinha, Postu Administrativu Pantai Makasar, Rejiaun Administrativu Espesiál Oe-Cusse Ambeno (RAEOA). Imajen/Espesiál. Komunidade sira simu vizita Lider Istoriku, Kay Rala Xanana Gusmão ne’ebé tun direita obserba uma komunidade no simuteriu jerál ne’ebé mota sobu iha Aldeia Nunuhenu, Suku Cuinha, Postu Administrativu Pantai Makasar, Rejiaun Administrativu Espesiál Oe-Cusse Ambeno (RAEOA). Imajen/Espesiál.

DILI: Lider Istoriku, Kay Rala Xanana Gusmão tun direita ba terrenu hodi obserba uma komunidade no simuteriu jerál ne’ebé mota sobu iha Aldeia Nunuhenu, Suku Cuinha, Postu Administrativu Pantai Makasar, Rejiaun Administrativu Espesiál Oe-Cusse Ambeno (RAEOA).

Enkuantu, udan boot ne’ebé akontese durante loron 24 Dezembru 2022 kalan halo mota Tono konsege sobu uma komunidade nian kuaze 10 hamutuk ho Uma Lulik Nunuhenu no rate lubuk ida iha simuteriu públiku konsege hetan estragus, tanba rai taka no sobu.

Tan ne’e Lider Istoriku, Xanana dehan, nia parte sei buka koordena ho emprezariu Oe-Cusse oan atu apoiu ekipamentu pejadu buka rezolve problema ne’ebé komunidade sira enfrenta, liu-liu normaliza hikas mota dalan atu satan bee mota labele sobu uma komunidade sira nian.

“Ha’u sei ko’alia ho ita nia setór privadu Oe-Cusse oan para normaliza deit mota dalan,” dehan nia iha komunikadu ne’ebé Online INDEPENDENTE sita, sesta ne’e (13/01).

Iha fatin hanesan, Komunidade Aldeia Nunuhenu, Suku Cuinha, Olinda Maria Ribeiro da Cruz konta udan loron tomak iha loron 24 Dezembru 2022 liubá lori tristeza ba povu, tanba preparasaun povu atu ba misa natál simu Na’I Jesus Kristu nia moris hias nakfilak sai tristeza ba sira.

“Udan kuaze loron tomak iha 24 Dezembru too kalan boot mota  Tono tun naresin mai sobu tiha bronjon kontinua mai sobu ami nia uma too rate sira iha simitériu laran mos mota sobu hotu,” dehan Olinda Maria, durante simu vizita Xanana bainhira halo obserbasaun iha terenu.

Nia dehan, hafoin akontesimentu, sira nia parte konsege hetan apoiu umanitaria hanesan foos, mina no aihan seluk tan hosi ekipa Apoiu Umanitariu Maun Boot Kay Rala Xanana Gusmão ho Kruz Vermelha Timor-Leste (CVTL).

“Ami foin simu apoiu hosi maun boot Xanana ho Kruz Vermelha, maibé autoridade RAEOA to’o agora seidauk fó apoiu ruma no seidauk koloka ekipamentu ruma atu mai normaliza mota dalan,” nia preokupa.

Nune’e mós, Xefe Suku, Cuinha, Domingos Seco Caunan preokupa inunadasaun ba dala rua ona, primeiru iha loron 4 Abril 2021 no agora akontese tan, maibé autoridade RAEOA seidauk fó apoiu ruma ba vitima sira.

“Mota mai sobu dala rua ona, maibé too agora autoridade RAEOA mai promote atu hadia no harii fali uma komunidade nian no dehan atu lori apoiu mai, maibé too agora sira la mai,” nia preokupa.

Nia dehan, importante liu maka autoridade RAEOA presiza koloka ekipamentu pejadu atu normaliza uluk mota dalan hodi evita mota labele kontinua sobu hela fatin komunidade no natar.

Entretantu, durante hala’o vizita, Xanana Gusmão hamutuk ho komunidade sira hala’o mós serimónia rituál agradesimentu no husu lisensa ba naturaza atu labele sobu bebeik uma komunidade sira nian.

Hafoin serimónia ritual, Xanana kontinua hala’o dialogu ho komunidade sira hodi rona sira nia preokupasaun no esplika preparasaun partidu CNRT hodi hasoru eleisaun parlamentar mai, CNRT tenki manan absoluta iha Oe-Cusse no munisipiu seluk tan hodi kaer ukun hadia problema no nasaun.

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV