“Ha'u em nome g7+ fó hanoin ba Organizasaun Nasoins Unidas katak, buat hotu ita bele hakarak hanesan mundu tomak, hakarak pás, maibé ha'u hakarak korrije mós mekanizmu atu garante pás iha fatin-fatin”, dehan nia, hafoin fila-hikas husi Novaiorke, Sesta (27/4).

Nia hatutan, iha fatin barak tinan sanulu besik to’o ruanulu resin ona mak peace keeping iha ne’ebá, ida ne’e para hotu-hotu tau netik hanoin oinsá mak ONU bele sai efetivu liu.

Eis-Prezidente Repúblika ne’e hatutan, tuir mundu iha pás nian hatete esperiénsia hatudu katak ajénsia ONU ninian ladún efetivu no gasta osan barak.

“Ha’u hanoin buat sira ne’e bele kontribui para halo analiza di'ak liután iha ONU rasik haree ba kestaun pás”, teni nia.

Tuir pesoál eminente Xanana Gusmão katak, sekretáriu jerál ONU dehan envezde reaje iha konflitu ONU tenke prepara-aan atu prevene, sé buat ruma ONU ba kedas prepara-aan atu rezolve.

Reuniaun ne’e la'o di'ak tebes tanba tebes, tanba hahú permite ona ba g7+ fó hanoin kona ba esperiénsia ne'ebé sira hetan ho ajénsia sira iha ONU iha g7+ ninian rai no nia-prosesu rasik.