Vise Koordenadór Juridisaun AMP, Tiago Sarmento kestiona CNE la imparsial tanba iha atividade balun hanesan dialogu ne’e la hanesan kampaña ho mini kampaña maibé iha parte balun delegada CNE haruka hapara atividade dialogu AMP nian.

Hanesan iha Munisipiu Suai, balun iha Maliana no delegada sira ne’e akompaña husi PNTL ameasa tan fali estrutura AMP iha baze.

Maibé dialogu ne’e la viola lei bainhira la hanesan ho kampaña tanba nia la halo barullu no dialogu ne’ebé halo iha uma ida ne’e lei hatete klaru.

“Tanba ne’e ami kestiona CNE nia imparsialidade ba situasaun ida ne’e,”dehan nia iha sede AMP Bairu Grilos, Kuarta (25/04).

Nia deklara, iha Suai-Fatululik delegada ida hapara atividade dialogu AMP nian. Tanba ne’e AMP rekomenda ba instituisaun PDHJ, Ministériu Públiku, PSIK liliu mós ba CNE atu labele taka matan no labele nonok haree ba violasaun sira ne’e.

Iha fatin hanesan, Carmelita Moniz hatete, kalendariu AMP nian ba kampaña eleitoral ne’ebé hatoo ba CNE kompletu tebes no iha atividade tolu ne’ebe AMP sei hala’o durante kampaña eleitoral loron 30 nia laran, ida mak komisiu mini kampaña no dialogu.

“Kona-ba dialogu ne’e fas parte dor to dor bele hala’o fora husi kampaña katak kampaña eleitoral hahú husi 8:00 dader too fali tuku 6:00 lorkraik no 6:00 ba leten partidu politiku sira so hala’o de’it iha taividade dor to dor iha area uma no nia kriteria mak labele utliza atributu partidu labele halo viva ne’e labele,”dehan Carmelita.

Tur informasaun katak iha momentu ne’eba partidu AMP ho FRETILIN mak halo dialogu maibé partidu FRETILIN utiliza atributu partidu nian no halo hakilar mós viva ida ne’e CNE la hapara, CNE ba hapara fali AMP nian ho dehan katak keisa AMP la hatuun bandeira.

“Tanba ne’e mak ami kestiona CNE bele hala’o nia knaar tuir lei maibé kuandu iha keisa ruma tenke buka hatene ida ne’e los ka lae depois mak hola asaun no tenke mantein nia imparsilalidade durante hala’o nia supervizaun prosesu eleitoral ne’e,”tenik nia.