Embaixadór Australia iha Timor-Leste, Peter Roberts hatete, Governu Australia hamutuk ho povu Australianu iha komitmentu hodi apoiu vasina AstreZeneca mai Timor-Leste hodi luta hasoru Covid-19.

“Vasina AstraZenaca doze 10.000 ne’ebé ohin oferese mai Timor-Leste ne’e produtu Australia nian rasik ne’ebé produs iha Melbourne,”dehan nia iha sala VIP Aeroportu Nikolau Lobato, Comoro (5/05).

Nia hatutan, hanesan parseria ho Timor-Leste tenki servisu hamutuk hodi kobre vasina universal atu sai hanesan dalan úniku ida hodi manan moras pandemia ida ne’e.
Iha fatin hanesan Ministra Saude Odete Maria Freitas hatete, ho koperasaun bilateral ne’ebé di’ak ho Governu Australia tanba ne’e sira oferese tan vasina AstreZeneca doze 10.000 mai Timor-Leste.

Ho nune’e Ministra Saúde lori Governu Timor-Leste nia naran hato’o agradesementu profundu ba ajudus hirak ne’ebé Australia oferese ona mai Timor-Leste no husu atu kontinua reforsa koperasaun bilateral ne’ebé antes ne’e lao hela.

Enkuantu, vasina ida ne’e sei lansa ba públiku iha loron 10 fulan-maiu tinan 2021 no ema ne’ebé sei hetan vasina AstreZeneca doze 10.000 mak hanesan, ema ho idade 60 ba leten, moras kronis sira hanesan, ran-midar, sofre moras-rins, HIV/SIDA, diabetes no moras kronis seluk atu nune’e bele reforsa sira nia imunidade.

Entretantu, vasina AstreZeneca ne’ebé oferese husi Governu Australia hamutuk doze 20.000, maibé ohin transporta uluk doze 10.000 mai Timor-Leste.
Tuir planu, vasina 10.000 doze husi Australia sei mai tan iha loron 19 fulan-maiu 2021.

Molok ne’e Timor-Leste simu ona Vasina AstraZenaca hamutuk dozes 24.000 husi Organizasaun Mundiál Saúde (OMS) liuhusi COVAX Facylity iha loron 5 fulan-abril tinan 2021.
Nune’e ema rihun 28.000 mak simu ona Vasina AstreZeneca ne’e.

Jornalista:Camilio de Sousa

Asisten Editor:Saturnina da Costa