Tuir Ministru Prezidensia Konsellu Ministru, Fidelis Leite Magalhães hatete Governu liu husi Konsellu Ministru (KM) aprova ona projetu Dekretu Governu nian ba alterasaun dahuluk ba Dekretu Governu N. 14/2021 loron 29 fulan-abril, kona-ba medida sira ezekusaun deklarasaun estadu emerjénsia ne’ebé efetua husi Dekretu Prezidente Repúblika N. 24/2021, loron 28 fulan-abril.
“Ho alterasaun ida-ne’e indivídu hotu iha nasional nia laran ne’ebé abranje husi operasaun sira testajen masál ka aleatória, tuir kritériu sira ne’ebé define husi autoridade sira saúde nian, obrigadu atu realiza ezame médiku sira ba diagnóstiku COVID-19 ka infesaun husi SARS-CoV-2,”dehan nia iha konferensia imprensa iha Ministeriu Finansas Aitarak laran, Dili (05/05).
Fidelis hatutan, ba indivíduu sira ne’ebé rekuza hodi realiza ezame médiku husi diagnóstiku obrigatóriu, sein prejuizu responsabilidade kriminál, sujeita ba izolamentu profilátiku obrigatóriu, iha estabelesimentu saúde, rezidénsia ka iha sentru izolamentu ne’ebé estabelese ba efeitu husi Estadu.
Iha despeza hirak-ne’e, relasiona ho izolamentu profilátiku nian indivídu rasik maka selu.
Governante ne’e akresenta, ba sidadaun hotu iha nasionál ka estranjeiru ne’ebé hakarak tama iha territóriu nasionál tenke hala’o uluk pedidu autorizasaun prévia.
Asisten Editor:Saturnina da Costa
