Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, husi númeru kazu foun 133 ne'e, Dili 109, na’in 18 iha Baukau, Ainaro kazu 3, Lautem 2, no Manatuto 1.
“Husi númeru kazu foun deteta ohin, sira ne'e hotu proporsaun kazu sintomatiku hamutuk 21,8%,” dehan nia iha komunikadu, ne’ebé Online INDEPENDENTE asesu, kuarta ohin (5/05).
Nia esplika, proporsaun kazu sintomátiku durante loron 7 nia laran, aumenta husi mediana 8,8% iha semana 2 liu-bá, ba mediana hamutuk 15,1%. Ida ne'e hatudu tendénsia atu surtu Covid-19 iha Timor-Leste avansa ba modelu ho predominánsia iha kazu sintomátiku.
Ho nune’e total kazu konfirmadu kumulativu sura husi loron 21 fulan-marsu tinan 2020 to’o loron 5 fulan-maio tinan 2021 hamutuk 2.786.
Entretantu dadus jeral ba loron ohin iha kazu foun na’in 133, kazu rekuperadu 34 no kazu ativu iha izolamentu hamutuk 1.414.
Enkuantu dadus mundial Covid-19 iha kazu foun ohin loron (5/05) hamutuk 153.738.171 no kazu mate hamutuk 3.217.281.
Asisten Editor:Saturnina da Costa
