Nune’e, Ministériu Administrasaun Estatal (MAE) hamutuk ho Sekretariado Tekniku Programa Nasional ba Dezenvolvimentu Suku (PNDS), dezenvolve ona lalaok oinsa atu ezekuta programa harii uma ba kbiit laek sira ho efetivu no efikás.
Tanba ne’e, molok atu harii uma ba kbiit laek sira, ekipa sira sei halo uluk sosializasun ba komunidade sira hahú husi nivel suku to’o nivel aldeia no identifika mós uma ema ne’ebé vulneravel liu.
“Uma ba kbiit laek sira sei hahú konstrusaun iha fulan fulan jullu tinan ne’e,”dehan nia iha knar fatin, MAE, Kolmera (06/05).
Iha mós matadalan ida hodi esplika kona-ba prosesu elaborasaun planeamentu determinasaun hahú husi nivel Aldeia, Suku, Postu Administrativu no Munisipiu ne’ebé programa PNDS elabora benefisiariu kbi’it-laek sira ne’ebé elejivel.
Ho nune’e iha prosesu konstrusaun sei involve komunidade sira ne’ebé lidera husi Xefe Suku, konsellu Suku, ekipa jestaun Suku, Autoridade Postu Administrativu no Autoridade Munisipal.
Iha sorin seluk Diretora Programa Nasionál Dezenvolvimentu Suku (PNDS), Claudinha Soares Pinto hatete, programa Governu atu halo konstrusaun uma ba kbi’it la’ek ne’ebé lidera husi PNDS, iha tinan ida ne’e sei hahú halo konstrusaun uma hamutuk 1.272 ba família ne'ebé identifika vulnerável.
Ema ne’ebé sei hetan uma husi Governu mak hanesan, kondisaun ekonomia laiha, rendementu menus husi $1.25 kada loron, ema ne’ebé idade 60 ba leten, faluk ho oan-kiak, no defisiensia.
Total orsamentu ba konstrusaun uma kbi'it laek hamutuk millaun $25 no modelu uma nia medida 3,80 metru kuadradu iha kuartu rua ba familia kiik (ema ida ka rua) no medida 4,2 metru kuadradu iha kuartu tolu ba familia barak, inklui dapur ho harus fatin iha liur. Material konstrusaun ba uma kbiit-laek sei uza batako.
Nia akresenta, prosesu ba konstrusaun uma kbiit-laek (UKL) sei konstrui ba ema kbi'it-laek nia hela fatin atuäl la halo bairo foun.
Kondisaun uma no nia estrutura mak hanesan, fondasi, didin, kuartu, kondisaun no kakuluk, iha sala han fatin ida, dapur no haris fatin ida, iha instalasaun eletrisidade, bee mos no kada uma ida sei iha badaen na’in ida atu halo konstrusaun.
Molok ne’e ekipa sira halo sosializasaun ba uma kbiit laek sira iha teritoriu laran tomak remata ona iha fulan janeiru tinan 2021.
Asisten Editor: Saturnina da Costa
