Ministru Edukasaun Juventude no Desportu, Armindo Maia hatete, livru ne'ebé UNICEF entrega ba MEJD nia objetivu atu fahe ba estudante hahú husi Pre-eskólar to'o ba ensinu báziku, tanba livru ne’e mai kleur ona maibé seidauk distribui.
“Livru ne'e mai kleur ona maibé lakonsege distribui, tanba ne'e agora mak atu distribui, atu nune'e bele ajuda ita nia estudante sira no balun mós ba mestri sira," dehan nia, iha ambitu lansamentu distribuisaun livru ba eskola pre-eskolar no ensinu baziku, iha Armajen Ariana, Bairo-Pite, kinta ne'e (15/12).
Tuir Governante ne’e katak, iha Timor-Leste, presiza livru mak bele kura ema, tanba maioria telemovel mak domina ona to'o 24 oras, entaun presiza iha kultura ida lee livru.
Iha fatin hanesan, Reprezentante UNICEF iha TL, Bilal Aurang Zeb Durrani, iha nia diskursu hateten, UNICEF kontenti tebes no orgullu hodi hola parte iha eventu importante hodi entrega livru millaun rua ba MEJD, ne’ebé aseleradu husi Global Partnership for Education (GPE), iha ámbitu subsidiu finansiamentu ba situasaun Covid-19.
“Ha’u fiar katak, livru sira ho volume emprimisaun boot mak MEJD simu husi parseria unika,” tenik nia.
Nia haktuir, livru sira ne'e inklui ona livru istoria, livru ba atividade, livru ezersisiu ba labarik pre-eskólar sira to'o ensinu báziku husi sestu-ano.
Aleinde, inklui mós giaun ba profesor sira hodi apoia mellora sira-nia koñesimentu jeral no bele uza hanesan instrumentu hodi hanorin no hadia aprendizajen ba labarik sira.
Ho nune’e, livru sira ne'e, sei distribui ba eskola ensinu baziku hotu iha pais ne'e, fó ba labarik iha eskola sira atu iha oportunidade bele lee no aprende, no mós atu ajuda labarik sira iha jerasaun futuru mai.
Reprezentante UNICEF ne’e, haktuir tan katak, iha tinan tolu liu ba, labarik sira-nia aprendizajen iha Timor-Leste, nune'e mós ba labarik sira iha mundu, afetadu maka'as, ho nota aprendizajen ne’ebé kiik tebes, relasiona ho pandemia Covid-19.
Tuir nia, fator ne’ebé kontribui ba nota aprendizajen ne’ebé kiik mak prosesu aprendizajen laiha no mós hanorin la adekuadu tanba iha situasaun pandemia.
Tan ne’e, UNICEF apela ba lider eskola sira, profesor sira no inan-aman sira atu utiliza rekursu sira hodi apoia melloramentu abilidade alfabetizasaun.
Entretantu, Bilal Durani dehan, Ministeriu Edukasaun Juventude no Desportu, dezenvolve ona matadalan ba eskola sira kona ba forma diak ida atu armazena livru sira ne'e ho diak no seguru maibe importante liu mak oinsa atu hodi promove hadomi lee, halo katak livru sira ne'e asesivel ba estudante sira no dezenvolve kultura lee nian.
"Ita tenke fó fila fali labarik sira-nia aprendizajen ne’ebé lakon, imajina sistema edukasaun ida diak-liu ba Timor-Leste, no halo labarik sira fila fali ba modelu aprendizajen ida kompletu,”haktuir nia.
Enkuantu, livru hirak ne'ebé UNICEF entrega ba MEJD, nia orsamentu mai husi Global partnership for Education liu husi subsidiu finansiamentu ne’ebé aseleradu ba Covid-19 ho montante hamutuk dolar amerikanu rihun $840.
