Tanba ne’e, MAE ho MEJD hala’o ona reuniaun koordenasaun, iha Salaun Nobre Ian Martin, INFORDEPE, Matadoru, Dili, kinta ne’e (15/12), nune’e, hodi implementa programa refere.
“Ohin (15/12), Ministeriu Administrasaun Estatal hamutuk ho MEJD halo koordenasaun ba implementasaun medidas bá apoio ne'ebé Governu iha tinan fiskal 2022 liu husi orsamentu ratifikativu fó apoiu ba setor edukasaun, liu husi programa Bolsa Estudu ba Méritu sira no mós ba programa Eskola iha Uma,” dehan Ministru Administrasaun Estatal, Miguel Pereira de Carvalho, iha komunikadu ne’ebé Online INDEPENDENTE asesu.
Nia hatutan, reiuniaun ba koordenasaun ne’e importante tebes, tanba ne’e, konvida mós Administrador ho Prezidente Autoridade sira hotu atu partisipa, nune’e sira bele garante medida ne'ebé governu trasa ona iha tinan 2022 nian, liu-liu bolsa estudu ba méritu nian.
“Ita bo'ot sira hare foin dadauk alunu sira ne'ebé, partisipa iha ezame nasional no ezame ba pasajen husi klase ida ba klase seluk, siklu ida ba siklu seluk, tuir norma sira no mós regulamentu sira konabá bolsa bazeia ba mérito nian ne'ebé sei atribui ba mellór estudante sira,”nia dehan.
Ministru ne’e dehan, nia fó ona instrusaun ba Administrador no mós Prezidente Autoridade Munisipal sira hotu, atu garante servisu munisipal ba edukasaun sira, hamutuk ho Diretór eskola sira iha teritorio Timor-Leste tomak, hahú husi Ensino Pre-Primaria, Ensino Baziku, Ensino Sekundario no mós Ensino Tekniku Vokasional sira atu bele implementa norma ida ne'e tuir regulamentu sira ba bolsa estudu ba méritu no mós ba Eskola iha Uma ho diak.
Tuir Governante ne’e, papel Administrador no Prezidente Autoridade Munisipal importante tebes atu garante sasan sira ne'e, tanba sira mak hanesan reprezentante Governu sentral iha munisipiu, hodi hala'o programa husi Governu sentral nian.
Tanba ne’e, implementasaun ba programa ne’e, sei impleta mós iha munisipiu, postu no mós suku sira, tanba ida ne’e papel Ministeriu Administrasaun Estatal nian.
Entretantu, iha sorumutu refere hetan partisipasaun husi Ministru Edukasaun Juventude no Desportu, Diretór Jeral sira, Diretór Nasional MEJD nian, Prezidente INFORDEPE ho ninia Vise, Prezidente Autoridade Munisipal no mós Administrador Munisipiu sira.
