Prezidenti AMRT,I.P Hamar Antoninho, hateten, komprimisiu estatutu AMRT nian mak kria tan espasu ida hanesan refleksaun ba memoria sira ba heroi sira funu kontra kolonial, segunda guerra mundial no memoria kona ba luta ba tinan 24 nian laran.

Tan ne’e, objetivu atu harii Jardin Chama Eterna ne’e, atu fasilita ema hotu no mós familia heroi sira ne’ebé mate ba rai ida ne’e atu halo reflesaun.

“Espasu ida ne'e importante tebes atu manten ita nia memoria ida ne'ebé moris hodi hatutan ba ita nia jerasaun sira,”dehan nia iha Muzeu Rezistensia, sesta ne’e (16/12).

Nia hatutan, Jardin Chama Eterna sei sai fatin reflesaun ba ema hotu atu fó ómenajen ba heroi sira ne’ebé mate ba rai ida ne’e.

Iha fatin hanesan Na’in ba Kompañia Star King Konstrusaun, Lda, Lay Siu Hintg, afirma, estadu fó fiar ba sira nia kompaña hodi kaer konstrusaun ne'e no garante katak obra ne'e sei remata tuir tempo ne'ebé determina ona.

Entretantu, Jardin Chama Eterna ne’e konstrui besik Muzeu nia oin. Ne’ebé reprezenta investimentu públiku ho total dolar amerikanu hamutuk millaun $ 5.059,000,00, iha ne'ebé $4.548.000,00 ba konstrusaun obra, $351.500,00 ba supervizaun obra no realizasaun estudu tékniku $160.000,00.

Enkuantu, obra ne'e rasik sei hahú iha tinan 2023 ho nia durasaun tempu durante fulan 18 no tuir kontratu, nune’e sei inagura iha tinan 2024.